旭旭字典(五十二)：認真的馬騮

幼稚園又放流感假，鄭旭蘭一早起來懶洋洋地在梳化上滾來滾去，無所事事。

旭突然轉身問媽：鄭係點解呀？

媽想一想答：有個詞語叫鄭重，係認真咁解！

旭宣佈：咁我即係認真人啦！（註：旭旭姓鄭）

媽微笑表示同意。

旭又說：但係我又唔似馬騮人，我鍾意食蘋果多過香蕉。（註：旭旭猴年出生）

媽補充：其實馬騮都好鍾意食蘋果，所有水果都鍾意。如果比隻馬騮搵到個蘋果，佢會即刻咬佢一啖！

旭大力點頭附和：我見到個蘋果，都想即刻咬佢一大啖呀！

不用上學的日子，這隻自稱認真的馬騮人，日日想出古靈精怪問題考媽媽！

相片：星期日早上，旭旭相約同學仔馬焯楠在藍地的合利茶餐廳品嚐馳名的帝王餐！