牛爸爸の我的最愛

我的最愛
                                                          (By 牛爸爸)

今日我想同大家講下，我牛爸爸有幾幸運。

早前花成長達半年既時間都搵唔到合心意的舖位，「牛記」無限期押後，經濟不景，仲黎個H1N1，點知比我係咁既情況下得到份好工(6月1日已上班)，仲要做翻老本行，人工同前途都好左，但係，呢啲唔係我今日想講既幸運。

講下搵到好工後我地做過乜先~~

首先confirm同老婆及細妹(皮媽)去旅行，因為牛牛媽最鐘意去旅行，原意去日本食晒佢地啲野等佢地鬧飢荒，點知日本對我地呢個行動嘅應變措施係"豬流感自爆"!  殘念!  征討日本仔計劃失敗，轉移去上海食晒佢地啲小籠包。

跟住第二波係去買DAC，upgrade下自己套音響 (早幾篇blog黑面家聚會有提及過)，多謝黑面爸爸帶我去買左個好滿意又好平既DAC。原本咁樣就算，冇第三波喇；點知，有晚去貓友聚會，同鯊魚爸及毛正唔知點解傾起電單車，牛媽媽忽然答腔 :「牛爸，遲D我地買翻架車渣」我心諗 :「下! 乜咁筍?!無啦啦比我買電單車? 乜唔係要買私家車既咩?」

要知道，我半年冇做野，去搵舖，冇收入，樓照供，街照去，牛又病，雖然有點點積蓄，但係以牛牛媽呢個家庭財政司嘅觀點黎講，係冇理由叫我去買車架，而且份新工雖然點計都好穩陣，但係世事嘅野好難講架嘛，而家個社會環境又唔好，仲花錢去買一架只係愛黎玩嘅電單車? (我好乖架，我啲錢比晒牛牛媽Keep架)！

我個人就係咁，有人撻著我，我乜都唔會理就走去睇下先，點知又比我搵到架以前嘅Dream Bike，一架我曾經認為一生人無擁有過會後悔，但係又已經係多年前停止進口嘅大怪獸 ─ Royal Star!!!

Royal Star喎，有理冇理去睇左車先講，睇完中埋毒，翻到屋企先問牛媽 :「老婆，你真係比我去買架Royal Star?」牛牛媽答道 :「車! 我講下之嘛!」

Oh shit !!!!!!!!

跟住落黎果兩日，我只係間唔中叫下牛牛媽個名，但係又無講其他野，一個鐘大概叫佢10次左右.....

最後我同牛牛媽講，雖然而家唔係一個好嘅timing買車，但係我知道到岩timing買車時，我一定搵唔翻一部個condition咁好嘅Royal Star，而且再過幾年我渣呢啲車會比而家辛苦好多，因為Royal Star係一部長8尺、重7xx磅、馬力1300cc的大怪獸，最重要既係，我.....手痕!!!

最後達成共識，如果賣家能夠落價的話我就去買，以及，應承牛牛媽一年之內減食煙量至每天最多5支

當然啦，講左咁耐，最後我梗係買得成架車啦!

不過，呢個都唔係我所講既幸運。

我真正既幸運，係我有呢個老婆!

我覺得我呢個moment走去買呢架車係絕對唔理智兼敗家的，但係牛牛媽又知道我好鐘意，佢就好似王菲隻歌“你快樂所以我快樂”裡面既內容咁，容許我做呢件唔理智嘅事。

買完部車後，某日我同牛牛媽行行下金魚街時，我同佢講 :「老婆，我地一定會白頭到老」那一刻，我比簽結婚證書時更認真而且更有信心! 娶到好老婆/老公嘅人，要好好珍惜啊!

一部車，並不只是一部車的意思，幸運嘅係我全部get 晒呢個故事背後嘅所有含意，有多冇少。

如題，我的最愛.....其實係：

渣住部車，我諗住牛媽
到渣完部車，見到牛媽，我又諗住部車。

我的最愛...其實係咪最愛我自己? (自答：唔係!)

其實仲有好多肉麻野想講，但係唔講喇，費事你地反胃。

各位觀眾!!!!! Royal Star!!!!!






噢~~ 我的V4引擎啊

                                        

後記：上海行，見到個朋友係上海有自己一片天，好開心，法蘭先生係強悍既香港人，相信法蘭伉儷會永遠幸福快樂。


‧

‧

‧