繼續落藥

星期日晚, 加希常記掛著第二天要返醫院的事, 半夜不時問姐姐幾點鐘. 未夠七點就要食麵, mami就煮了給他吃, 不久就瞓返. 待他睡到八點半, 便叫醒他返醫院.

昨天回醫院都好暢順, 去到門診又唔多人. 但加希尿頻得很厲害, 平均十五分鐘就話急, 每次都痾好少. 他一急就自己除褲, 真係醜死怪! 因為肥仔藥的副作用, 他很快又要食麵, 到了十一點, 他已經好眼瞓, 要飲奶奶. 帶佢上二樓借奶樽, 加希第一時間走左入日間病房要上床飲奶. 好在姑娘肯借張床俾加希, 否則他又大發脾氣了. 但飲完奶落返地下等睇醫生時, 加希又扭計要床床, 枕頭, 點都唔肯瞓梳化. 我只好指住個鐘話十二點就可以上去瞓床床啦. 都知加希忍得好辛苦. 可能醫生睇症期間都聽到他的喊叫聲, 一入去見醫生就安慰加希, 話: "辛苦埋下個星期啦!"

上到日間病房, 加希唔係太想食野, 但就飲左差不多半公升的湯, 尿仍然係每次痾少少. 姑娘話驗唔到d尿有問題. 在遊戲室玩未夠就有藥, 加希無奈的回房去. Mami又記錯左, 原來昨天只須落兩隻藥, 當吊完西瓜汁同打完血管針, 姑娘已推走"棵樹", mami覺得奇怪, 一問之下, 才知道上星期二落的藥是有效兩星期而唔係一星期, 所以省卻了三次的痛苦. 加希知道唔駛駁機+貼心口, 開心到不得了. 他以為即刻可以返屋企, 但因為尿頻, 要醫生巡房先決定走唔走得. 成醫生問加希落完藥有無唔舒服, 加希都好醒咁話: "無事啦!" 醫生最終都放我地走啦.

成個下午都行雷同落大雨, 加上行李好重, 走既時候差唔多六點, mami話同加希搭的士回家, 起初加希扭計話要搭巴士, mami問佢點解, 佢好認真咁話: "搭的士好貴, 搭巴士唔貴!" (哈! 咁識慳家既?) 不過最後佢都肯搭的士.

今朝加希又係咁早起身, mami陪佢再瞓一陣, 他見daddy食緊麥皮, 就彈左起身, 食晒daddy未食的半碗都唔夠, 最後食了三碗麥皮 (平時佢係麻麻地鐘意食麥皮既!) 之後精神好好, 唱左好耐歌, 但藥力未過, 下午mami想休息一陣, 佢都唔肯, 大叫大喊, mami只好陪佢玩!

落完西瓜汁, 加希面仔紅卜卜.

P.S. 今天加希的尿頻情況已明顯有改善, 之前會擔心化療藥影響他的腎功能