黐線武俠小說__劍王鬥劍聖‧ 卷二十二

　　話說無名村縣令曾大權為咗慳電膽事件搞到一身蟻，又道歉

又搵馬仔頂住都唔掂，惟有搵啲嘢嚟引開村民嘅注意力，於搞咗

一間四大才子畫廊旅舍，仲請咗 吳中四大才子 嚟剪綵。

　　吓，點知摷極都唔見嗰個死鬼風流才子唐伯虎，時間又夠晒

嘞，所以曾大權惟有充當才子，湊足四大才子之數，但係已經畀

嗰啲新聞紙記者柴晒台，因為佢地話曾大權點睇都唔似才子喎。

 　　咁到底唐伯虎去咗邊呢？原來去咗鎅女，因為佢應約到無名

村剪綵嗰陣，啱啱遇到華太師夫人去觀音廟進香，於是就跟住去

。吓，唔係呀馬？叫得做夫人，梗係年紀有番咁上下架啦，唔通

唐伯虎有殺錯冇放過，連老夫人都啱？唔係，因為佢見到夫人有

個近身妹仔，真係一見鍾情，於是一於二仔底——死跟。

唐伯虎見到秋香，梗係三魂唔見七魄啦。　　李華川  漫畫

　　至於佢地喺觀音廟唐伯虎點樣點蚊香嘅劇情，上集已經講過

，今集唔再重複。依家不如講下唐伯虎點樣追秋香仲好啦。

　　話說喺觀音廟秋香對唐伯虎笑咗一笑，搞到我地唐才子真係

三魂唔見咗七魄。華夫人拜完神，就同埋一眾人等搭官船返華府

，唐伯虎當然係死跟啦。人家都上晒船，唐伯虎惟有租架艇仔吊

住隻官船。但話明係艇仔咯，點夠隻官船快架。眼見官船就快遠

去，唐伯虎正在垂頭喪氣，冇晒表情之際，忽然聽得一陣啪啪聲

，江上有一隻船仔飛咁快駛過，唐伯虎大喜，叫佢即刻停低，畀

佢上去追趕官船。點知艇仔上啲人話，我地喺度逃命，邊可能畀

隻船你用？原來呢班人喺無名鎮走私老番光碟，畀哎吔四大名捕

追到瘦，但係唐伯話只要你地畀隻船仔我，我可以幫你甩身，哎

吔四大名捕追到嚟，見到唐伯虎，唐伯虎話呢度已經係姑蘇地界

，唔係無名鎮管轄，所以唔可以拉人架，哎吔四大名捕齊聲話，

咁又係，於是行個禮就唔追究嗰班賊仔，轉回無名鎮去。

　　好嘞，講番唐伯虎，佢得到架大飛，當然追得到嗰隻官船啦

。點知當佢駛到官船旁邊，啱啱見到秋香走出嚟，佢見到唐伯虎

將大飛移近，心想，你個壞鬼書生咁都仲追嚟，真係狼得緊要，

好，畀啲嘢你嘆下至得，順手將一盆水對住唐伯虎照頭淋，唐伯

虎話，駛唔駛咁呀？吓，乜啲水咁好味嘅？秋香就話，呢啲係老

夫人嘅洗腳水嚟。嘩！唐伯虎大叫一聲大吉利是！秋香見到佢個

狼狽樣，不禁咭一聲笑咗出嚟。唐怕虎本來都好嬲，但係見到秋

香咁燦爛嘅笑容，又更加暈多一陣。

　　雖然追到架官船，但係夫人一眾人等返回華府，唐才子就有

辦法再接近秋香嘞。佢一路行一路諗，點樣先至以得到秋香呢？

行行下，唔覺意撞到一個人，呢個人就是出名鬼馬兼多計嘅祝枝

山，佢知道唐伯虎嘅心事之後，同佢講咁咁咁唔係得囉！說得唐

伯虎頻頻點頭。

　　過咗一日，有個奀奀瘦瘦嘅後生仔，嚟到華府，話要賣身為

奴，華太師本來唔想要佢，但係華夫人話見佢一表人才，又知書

識墨，搞到要賣身咁慘，就姑且叫佢教下兩個唔生性嘅仔阿文同

阿武都好，於是，唐伯虎就改名做華安，留低喺華府，做咗家丁

兼補習天王。

　　呢一回唐伯虎就真係花仔得米嘞，仲唔可以親近秋香？但係

點都要扮下老師，教下阿文同阿武架。呢一日，佢一本正經咁叫

佢地對對，出咗個對頭畀佢地對。對頭係

　　三面雲山誰作主

　　本來唐伯虎以為佢地資質咁低，一定對唔到。點知華文隨口

就對出嚟，佢口既對尾係

　　一頭霧水不知踪

　　吓，雖然係無厘頭，但係又幾工整噃。

　　點知華武話，老師，我可唔可以出番對頭畀你對呢？

　　唐伯虎幾乎笑到肚刺，你個傻仔都會出對頭？即刻話好啦

　　華文就話，對頭係

　　龍潭扮龍船，龍尾哽親龍眼樹，Sir！

　　對啦老師！呢一回當真考起才子，唐伯虎抓晒頭都諗唔到。

正在此時，華武話，華安唔識，等我嚟啦，對尾係

　　馬房舞馬騮，馬蹄踏到馬騮頭，Git！

　　嘩！好彩唐才子冇鬚，如果唔係，真係鬚都甩埋！

一向對對好叻嘅唐伯虎，依家被華文 同 華武  玩翻轉頭。 　　李華川  漫畫

　　話說自從華安入咗華府，就一直搵機會接近秋香，一於死纏

爛打，呢一晚終於約到秋香去柴房幽會。

　　今晚月黑風高，正好同情人幽會，華安印印腳咁走到柴房，

原來秋香已經喺入面，正係久旱甘露，華安唔理三七二十一，飛

身撲上秋香身上，係咁錫完又錫，但係秋香好似錫極都唔夠咁，

搞到唐伯虎一面都係口紅，唐伯虎覺得好奇，於是點着個枝慳電

燭一照（你咪睇少呢種慳電燭，自從華府採用咗之後，就將所有

蠟燭掉晒，搞到Ｄ蠟燭商人喊咁口，要去無名鎮政府總部抗議打

爛飯碗咁話），嘩！原來嗰個唔係秋香，係石榴嚟！而秋香就喺

旁邊笑到見牙唔見眼，仲遞上一張「掟煲」牌紙手巾添（乜呢個

鏡頭咁熟口面嘅？原來喺無名鎮嘅公仔箱裏面嘅告白，就時常見

到。所以唐伯虎話日後要求藍宇天客帶佢超越時空，控告嗰個告

白侵犯知識產權咁話喎），呢次係秋香第三笑，史稱「三笑姻緣

」就係講呢件事。

唐伯虎就係被秋香呢三笑搞掂，造就咗  三笑姻緣   嘅故事  　　李華川  漫畫

　　雖然畀秋香多番作弄，但係唐伯虎畀佢三笑迷住咗，無法翻

身，但點樣先至可以得到秋香呢？

　　冇幾日，華府話有貴客拜訪，原來係四大才子之一祝枝山，

佢同夫人講咗一番話，夫人立即叫華安出嚟，話失覺晒，原來華

安原來係江南才子唐伯虎，重話你想要乜嘢都可以畀你，華安當

然話要秋香啦。點知秋香唔肯嫁，仲要告唐伯虎性騷擾。呢件事

卒之鬧上官府，無名鎮縣令曾大權擇日開堂審訊。

　　開堂之日，曾大權把驚堂木一敲，大喝大聲問秋香，你告唐

伯虎性騷擾，有乜證據？秋香話，佢意圖或企圖向我示愛，仲呃

我去柴房咁咁咁（因為係二級半，呢句對白不便明言），重唔係

性騷擾？

　　曾大權話，咁又係。之不過，唐伯虎以一介江南才子身分，

不惜賣身為奴，都係想親近你啫，可見佢對你係一片真心，咁你

應該接受佢至係。於是就判秋香嫁畀唐伯虎。（至於呢單有關性

騷擾嘅案例，喺若干百年之後嘅無名鎮甘大威涉向女下屬示愛案

件中，作為先例可援，那是後話）。

　　好嘞，今勻唐伯虎卒之奪得美人歸，就開開心心咁拖住秋香

返屋企。

　　點知，秋香跟唐伯虎返到屋企，先至知道唐伯虎住喺無名鎮

嘅貧民區，搞到秋香大失所望。所謂「江南才子」，原來係空心

老倌，住埋Ｄ嘅爛鬼樓，日後都唔慌有好日子過咯！一時悲從中

來，後悔到要死咗佢咁話，拿拿聲走上天台，就想跳落嚟。好彩

嗰陣唐伯虎將佢一手拉住，笑口噬噬話，我「點」你啫，因為你

都「玩」得我多，所以玩番你一次咁多之馬。然後伸手一指，指

住近海邊好似屏風嗰座高到半天嘅玻璃屋話，嗰座先至係唐府，

值成七萬幾蚊一尺架，咁秋香先至笑番，攬住唐伯虎大叫好老公

好老公！咁就Happy Ending嘞。

　　因為唐伯虎呢次咁樣「點」秋香，就成為流傳落嚟嘅故事。