四人幫活動之慶生日

為了和四人幫唯一男丁Mair慶祝生辰，其餘三人已計劃三月七日去吃下午茶自助餐，地點是皇家太平洋酒店柏景餐廳，之後打算到山頂呼吸新鮮空氣。

 

是日晨早起來，和Mair看了《貓咪咕咕》早場，戲裡的咕咕實在好可愛，尤以baby咕咕最得意，好想好想抱佢一下用面擦擦咕咕。看完電影便約了其餘兩位隊友到黃大仙走一趟，上注香求枝靈簽。最後Mair有幫自己的小貓和仔求了一枝簽（幫貓求簽？聽過未？）。之後打算在黃大仙坐3C到中港城，大家一見到3C就跑了上去，最有趣的是行行下，越行越唔妥，點解會上山既？？？原來我地四個坐錯車呀！大家夾埋有八對眼都睇唔到個車牌寫“慈雲山（北）”，哈哈！！到了慈雲山總站下車，就四處亂找車坐，幸好有一架去又一城既專線小巴，咁我地就那那聲上去。時間一分一秒漏走，去到九龍塘港鐵站已經三點，我地個tea buffet係3:15開始，食遲少少唔緊要，最怕係去到過左鐘唔幫我地留位咁就慘，話晒係同人慶祝生日嘛，唔係咁好既！老襯行完山運之後，出左港鐵又行左個大運，我地誤以為個棟建築物係中港城，點知原來係海港城，死未？！又做左老襯，好彩最後都成功到達皇家太平洋酒店。

 

呢度既下午茶自助餐都算幾多野食，熱葷都有好十幾款，另有三文魚生、燕窩雞粥、椰子雞湯。又有中式點心燒賣、干蒸牛肉、珍珠雞、叉燒包、小籠包、魚翅餃等，還有以竹筒燉蘋果雞湯，好滋潤香甜，雞肉也很入味，正！美中不足的是甜品部分，選擇不多，沒有我的非佛，本來都有提拉米蘇，可惜我地遲左入座，那盆提拉米蘇已被各人蹂躙到體無完膚。飲品有橙汁、檸檬茶、熱紅茶（可自己加奶做奶茶）、熱咖啡，都係任飲。雪糕有四種味－－芝麻、紅豆、芒果和士多啤梨，芝麻最好味，紅豆不是不好，只是覺得d紅豆唔化，士多啤梨我冇試過，但幫友話好味。

 

食到差唔多，我地就轉攻玩朱古力噴泉。生果冇乜剩，唯有諗過第二d方法去食下d朱古力噴泉啦！我就將d朱古力整落d雪糕面上，一陣間d朱古力就變成脆皮了！好味呀！跟住我又玩第二樣，整個芝麻雪糕球之後用竹簽桔起舊雪糕，再放佢嚮個噴泉度，整左三層朱古力，而d朱古力又好快咁變成脆皮，最後我整左一舊脆皮芝麻雪糕，好好味道呢！大家不妨一試，又好玩又好味！

 

因為下毛毛雨，以及天空能見度低，所以取消了去山頂的計劃，轉至Plan B，坐車去銅鑼灣Rosedale happy hour，去到揀左個無敵大靚景，坐嚮軟軟沙發上，好想睡覺呢！原來我們入座時間仍是歡樂時光，所以每人有多一杯free drink呢！另外免費小食係蝦子花生，d皮脆到無人有，食晒之後，我好勇敢咁問waiter哥哥：“呢d有冇得refill架？”waiter哥哥話有架，咁我地又有一兜滿滿既蝦子花生啦～哈哈！！飲下傾下，好快就十點，係時候返歸。大家在中央圖書館前say了個bye後各自歸家。

 

這天的節目很充實、又玩得好開心，yeah！好快我地四人幫會補返山頂遊既活動，我好期待呢！