貓展後的巨蟹花膠鍋@土瓜灣鬍鬚安

呢日放假日同食家去左會展﹗參加香港寵物展2010，當日有貓展仲有寵物用品展覽。

仲以為好多唔同品種既貓可以睇下，點知原來係唔同既貓主人帶佢地既寵物入場俾0的師傅評分﹗

呢隻叫做暹羅貓﹗

呢隻仲肥過大狗，成個波咁﹗

呢隻十分雪白，又肥又滑﹗

好多隻貓0係度俾個師傅品評，之後最靚的就可以贏大獎﹗主人們當然開心啦﹗

都幾得意，可以睇下唔同既大貓，仲有好多資料，梗係搵番大狗個種類啦﹗

蘇格蘭摺耳﹗

佢地活躍度同埋說話都好低分，反而個表話佢都幾有智慧............真的嗎？最叻應該係呃野食﹗

佢係屬於短毛貓既一種﹗呵呵﹗

睇完貓展就去開飯，呢晚去土瓜灣老友介紹既鬍鬚安火鍋。

見佢門口貼住好多無線來訪問的廣告，以潮式特色火爐出名﹗

老友話呢排佢地打親邊爐都係來呢度，食物水準相當高，咁就要試下喇﹗

雖然無同老闆阿安哥無傾計，不過笑容可掬，十分客氣有禮，見到佢食都食得開心0的﹗

花膠藥材蟹鍋本來平時吃就$138，不過今次老闆話佢地得番巨花蟹，要$300一鍋。

人一世物一世我地一向都唔抗拒，三百就三百啦。

蟹是印尼花蟹，個鉗成隻兩隻手掌咁大，兩斤幾三斤重，我估咁鬼大隻在街市買都要成二百幾蚊。

多肉得不得了，啖啖肉，蟹肉鮮甜實淨，大家也讚好﹗

個湯底十分濃郁，花膠六多，第一次食吸哂0的湯味，好綿好軟，又幾好食喎﹗

呢度0的蝦超大隻，又唔係貴喎﹗$42兩隻。

蝦肉實淨爽甜，大啖大啖吃超過癮。

來鬍鬚安必試炸魚片頭，$30，即叫即炸即食，唔洗淥就咁食，脆卜卜又彈牙，滿口魚香。

特級牛頸脊，$138大碟﹗

呢度有腩位同脊位揀，我地嫌腩位會肥試脊位。

片片都相當厚切，雪花紋理平均，色澤紅潤，賣相超靚。。

輕灼半熟後入口軟身腍滑，厚切之下牛味相當濃郁，juicy又香甜，吃時根本不用蘸豉油，已是絕妙﹗

墨魚滑一碟只係$30，彈牙爽口，中間有不少墨魚粒，食落有質感，如墨魚味可以再濃一點更正﹗

大蟶子，又係唔係貴，$42兩隻﹗

大大隻，仲郁架大佬﹗

鮮甜又爽口，肉質新鮮得入口是脆的，無沙，那種甜味只有新鮮海鮮才做得到﹗

呢隻叫炸醬餃，小小辣幾好食﹗

花甲$25有八隻﹗抵食﹗

吃時最好切去黑色的部位，唔係會有少少腥﹗

豬頸肉卷，得意又新奇，打邊爐都係第一次，豬中間除了包住金菇外仲有青紅椒，吃時去了豬肉的油膩感，體貼﹗

蝦滑都係$30，個人感覺墨魚滑好食0的﹗

西洋菜新鮮爽甜，要了兩籃﹗

最後要個手打魚麵作結。

輕灼下一見佢發漲就食得﹗好有魚香，切得粗身有口感，如吃魚旦般，香噴噴。

埋單一人二百三左右，呢度食物價錢相宜，大部份都係$30左右，經濟抵食﹗

今次係要左個大蟹鍋所以貴左少少，如果點番普通鍋底，百幾蚊就可以走人，下次一定再來﹗