home office開張納納雜

我的home office終於收到第一張小訂單     正式開張了     其實「開張」呢個名目都係夾硬加上去而已    因為之前一路準備一路等訂單    在一個無時間表、無開張日期的情況下進行     

第一件事係改公司名    肚裏墨水唔夠唯有靠查字典    因本人五行欠水   所以用了個同水有關的字     英文名本來索性叫Aqua但因某人極力反對而放棄     話不好聽   aqua(水)又免費 (什麼反對理由！)    好啦     我承認我是個聽話的好孩子

有了公司名就要去register    去稅局申請商業登記證原來真係好快捷方便     那天是星期五下午    我只用了半個鐘就拿到商業登記    其間還做了一個統計處的問卷調查    統計處的小姐話近年都好多人開home office       事實上我申請的同時     都有10多人一起排隊申請     在香港    每分鐘究竟有幾多間新公司誕生呢？        

為了添置生財工具     我好努力地四處格價：包括四合一打印機、電話線、virtual office地址、書檯...

講起格價     先講部四合一打印機.....我地呢d外行人買科技電器產品    好多時係靠口碑、價錢去選擇     不過每人需要的產品唔同     口碑好的不一定啱自己用    更多時就要靠sales介紹    但我發現    香港sales的意見唔可以信十成    因為每個電腦商場、每間大型連鎖電器舖    都會有機會遇到代表不同生產商/品牌的promoter     佢地promote的品牌當然係最好        你試下去另一間    又比你遇到第二個品牌的promoter    包佢講的意見可以完全相反     聽完好多矛盾意見之後     我已經好燘     最後只好還原基本步：睇機價和墨水價     咁蹺有一部brother機有齊我要的功能(重有埋無線wifi)    墨水價格又唔算太貴   今個月做推廣由$1699劈價到$999    以現金找數再減$20    就抬了回家

申請電話線也要講價的    打熱線去問     sales會講個價錢你知    但原來他們手上還有好幾個不同的收費計劃    你唔討價還價    佢地未必會一五一十講你知     但究竟有幾多個plan     又基於什麼條件他們才會詳細透露呢？    呢個係一個謎...

virtual office越開越多    我不用甲級地區 (收費貴些)   只要近我的home office和地鐵站就可以了    virtual office有收包裹服務    有些只收一尺立方以內的包裹    過大就要額外收費     但問多幾間會發現有些收10個橙箱size以上    1-2天內收貨不另收費    一尺和10個橙箱的分別好大喎    你話格價幾重要呢

~FINE~