病情嚴重.............

早晌今個星期二已經預知自己開始唔多妥............但係熟知自己一返工就會撐掂佢.....所以星期三成個下午開組都面不改容，但係星期四一起身已經知大件事，喉嚨痛，出句聲都有難度，不過，下午要帶outing，所以死忍.................返咗工先算........

為己為人，我已經全程變咗幪面超人，其實戴咗口罩，真係連呼吸都有困難，再加上我既氣管不嬲都＂叻＂過人，所以真係十級痛苦，氣又換唔切，但係又要不停講野.........

哈哈哈！我估麵包公司都幾覺得我哋中心幾緊張，因為我係帶晒消毒紙巾，口罩俾小朋友，因為要自製麵包，我硬性規定小朋友一定要戴口罩（紙口罩），無計，我認我係緊張大使，話晒我都係感控主任，我真係唔想小朋友係因為我既活動而出事！

尋晚仲巴閉，我約咗同事出去買物資，之後我就返中心，搭地鐵途中，我個喉嚨超辛苦，令我忍唔住不停咁咳，當刻中我真係有理由相信我係會咳死，因為我自覺自己咳到好似肺癆咁，眼水，鼻水（好彩有口罩）係咁失控咁流。仲要停唔到，仲有D似吊癮中既道友..........但係我不得不佩服香港人既適應力，我一路咳，一路諗會唔會有人啤我，會唔會有人退避三舍，又或者會唔會有人出黎問我駛唔駛幫手？（最好係靚仔.......），又或者趕我落車，咁我要點做？？？

諗諗諗諗諗.........先發現靚仔又有愛心既真係冇，不過都唔駛咁若無其事呀？我係坐低咳，我旁邊果位伯伯都冇乜特別大舉動或行為去回應我既死咳爛咳.................最頂癮既係我一起身準備落車，我個位已經俾一位太太坐咗..............吓？話晒我都咳咗成三四個站，雖然我有晒防疫裝備，但係唔係咁急呀？

連續飲咗三日潤喉茶，把聲係好咗少少，起碼無惡化，但係唔代表有好轉，於是今日繼續頂硬上，大係成個下午的Prog，好彩今日唔駛焗野，但係都唔知點解一樣咁HOT？謎.........................今晚仲要豁出去，乜都食....................

係咪發現我一句都冇提過睇醫生同食藥，好明顯我係冇時間處理呢個問題，所以呢幾日都係意識打救，死頂！！！不過我星期六會安排一下，點都係睇睇安心D！！

祝福我呀朋友！！