向台北出發 - 準備中

繼上年東京自由行, 上個月中一家三口再次訂自由行套票, 不過今次目的地係台北, 同東京唔同,  東京跟團已去過多次, 但台北對我們來說係極陌生, 從未到訪過。我同老公、囡囡一齊睇旅遊書、上網揾資料, 就咁傻傻吓自己編咗個四日三夜台北行程。

今次係喺國泰假期買package (不過係揀乘港龍機), 估唔到仲平個EGL, 又有速遞送嚟唔駛自己去攞, 喺網上辦妥一切, 真係又快又方便。

為免去到當地同人逼, 我們就於網上登記辦理台證, 又費事喺香港機場等攞簽證, 老公就負責去金鐘代領一家三口嘅台證啦。

留意咗一排, 港幣對台幣基本上無乜波幅, 幾時對換都係差無幾, 於是就去咗出名換外幣嘅Berlin換台幣, 個rate都唔錯架係HK$1=TWD4.12。

仲有一樣係我每次飛都不能缺少嘅 --- 藥丸 (應該係類似鼻竇炎食嘅藥, 係藥劑師介紹), 無咗佢, 我雙耳就好似想爆咁, 直情個人都想死。我係不停食香口膠、講嘢、吞口水、按鼻反壓......都唔得, 唯有係呢粒細細嘅藥丸先幫到我, 無佢我真係唔得架!