食迴轉壽司要小心!

今日去左葵芳新都會廣場間元氣食壽司,一坐低我同Y傾計,隔離坐左一對父子,個仔大約7~8歲左右,傾傾下計見到服務生拎左碟手卷俾對父子,之後Y同我講,個男人淨係拎左個手卷,而個碟就放係Y同個父親0既中間!一個超尷尬0既位置!

我就同Y講,將我地0的碟放埋一齊,佢個碟由得佢放係度!我再睇下佢0的碟點放啦,開頭先見到個對父子0的碟係放係男人與Y 0既中間,其中有3隻碟係疊埋一齊,另外一隻碟就係手卷個隻碟,而佢地父子中間都放左2~3隻碟左右,可能個男人都察覺到我地有0的小動作,所以我見到個男人將佢自己個3隻碟放返去佢同仔中間0既位置,至於個手卷碟依然原封不動咁放係Y與男人0既中間!

係食野途中,我聽到個仔叫佢老豆食埋個手卷佢!我就聽到個仔話"爸爸食埋佢啦,都唔駛錢0既!"之後我就數下佢有幾多隻碟,4個紫色,3個綠色同埋2個剌身碟!

之後Y就叫左壽司,服務生送壽司過黎個陣,又係將個碟放係Y與男人中間0既位置!不過服務生就冇將2個碟疊埋一齊!跟住我就聽到個男人叫埋單!個服務生覆佢有3個紫色,3個綠色同埋2個剌身碟,個男人仲答係!跟住我就話"呢個紫色碟都係佢個喎!"個男人一聽到就話"仲有個手卷!"不過就講得好細聲囉!

之後個男人由俾錢到出門口都一直低頭,唔敢望過黎!

都唔明0的人,一碟手卷值幾錢0者!駛唔駛咁呀!見個碟放係中間就側側膊!再講,佢做得人地阿爸,點可以係小朋友面前做埋0的咁0既野!呢0的真係0既唔好教壞細!

所以大家食迴轉壽司個陣陣小心!唔好俾人乘虛而入!