(HU) 身處不友善之地

時間過得好快﹐一眨眼過左一個幾禮拜﹐豬兜旅程到左最後第二站。昨日依依不捨地告別久別重逢既波蘭朋友﹐繼續踏上旅程﹐來到匈牙利首都佈達佩斯。一落火車﹐覺得個車站好殘舊同好亂。先前到步捷克﹐斯洛伐克﹐同波蘭都冇咁多人圍埋問人要唔要換錢﹐酒店﹐等。

問路既時候﹐D 人不瞅不睬﹐直行直過﹐有D仲擺出"你問我啊?" 既態度。問3﹐4個先碰到一位好心人。算﹐可以既話靠自己。服務行業更甚﹐英文唔通﹐兜兜理解﹐但態度非常差。可能先前共產主義塗毒太深﹐佢地仲未接受到"做又36﹐唔做又36" 已經消逝既事實 。

先前認識幾位朋友﹐交談之下﹐佢地對佈達佩斯印象同兜而家感覺差唔多。咁靚既國家﹐咁富有既歷史﹐真係一大浪費.....

題外話﹐前幾日去波蘭既集中營之日﹐患上感冒同喉嚨發炎﹐幸好得朋友照顧﹐豬兜不至於舟車勞頓﹐在此﹐充心感謝朋友既照顧 。雖然佢睇唔明﹐希望佢感應倒。