笑著, 活著

小貓龍鳳胎home左, 今日既心情真係一大好呀! 成日講d 貓貓狗狗, 不如今日講下人丫~~~~

今朝搭小巴出黎, 見到一個久唔久就遇到既女仔, 突然有d感觸想寫下佢

初初留意呢個20幾歲既女仔, 係因為佢一開聲就 "大聲夾惡" 咁嗌 "巴士站"!!!!! 驚動全車人~~~~~

開始望一望呢個女仔, 見到個樣, 你就會知道佢有輕微既唐氏綜合症, 初時我都只係 "望一望" 佢 then 心諗: 自己返工危唔危險架? 會唔會俾壞人呃架?

但慢慢..........我開始留意到呢個女仔既轉變. 由好大聲叫落車, 到好正常咁叫落車, 仲識得同司機叔叔講唔該, 感覺好自然, 俾我覺得呢個女仔 "融入左社會" 了....

我唔識佢, 但見佢既感覺係 - 習慣了, 返工放工, 投入生活!

今日返工, 仲見到佢小背心, 牛仔短裙, 短boot仔 "咩" 個手袋仔返工, 一個好可愛既causal OL, 唔知點解我有一個開心既感覺! 只係我個人廢up 下既感覺, 我感覺到呢個女仔佢好努力既去過佢既生活!

突然間, 好佩服佢!

睇報紙, 好多團體都會為弱能既人士; 好多父母都正為佢既患有各種病唔可以過正常生活既仔女去爭取佢地o係社會應有既福利, 我覺得係應該既, 多d關注佢地既需要唔好令佢地覺得呢個社會遺棄左佢地係很好的. 另一方面我卻睇到有一d父母努力教導佢地既子女去靠自己自力更生, 感覺很好!有另一種既鼓勵!

見到有d朋友o係我面前怨呢樣怨果樣, 又怨點解呢個世界咁唔公平, 點解人人都對佢唔好, 公司又對佢唔好...............與其怨, 不如積極d去令自己生活得更開心啦!

要活得快樂!