YMCA

今早起床就打電話約大佬(阿星大哥)打羽毛球，點知佢話要去YMCA BBQ，我哋都跟住一齊去玩! 好開心又有街去、老公又放假!!

YMCA (烏溪沙) 好似好近，但係好耐都未去過，屋企步行過去都只係5-8分鐘， D女當然興奮啦! 不停問裡面有乜玩，老實講我都唔記得喇??

YMCA地方都好大，有個大球場同其他娛樂設施，兒童遊樂場就少D，有D仲要維修無得玩，我哋行來行去搵爐，行都行都我腳軟 (可能一連兩日都係Outdoor就係唔認老都唔得)，小朋友就只係問着…幾時可以玩!!!  終於搵到喇，不過就同兒童遊樂場距離好遠!! 就係噤.....我就一日裏面係個大球場來來回回五六次，真係想死!!! Help!!!

我哋成20幾人BBQ，由中午燒到夜晚，雖然我個個都唔識，無所謂啦，出黎玩吓傾吓，至在relax吓。小朋友就更加無所謂，唔識都玩一餐，哈哈!  大佬借咗D籃球、排球、羽毛球同足球，好開心，都有十年無撫個排球 (我同阿星都係打波識架)，我哋就當然係打番幾吓，諗番以前打波，真係好回味，成班人好開心，不過宜家好難約成班人打啦!!

到咗夜晚六七點就開始有D落雨，小belle就話D泥草黏住佢對鞋，就唔肯落地，真係比佢激死! 爸爸就可憐啦，多咗隻樹熊黏住佢…..