出TRIP後記

今次又再戰BERLIN IFA，大大話話都去過４，５次，不過每次既組合都唔同，今次應該係最開心的配搭，不過換來既係大大既壓力，以往出TRIP都有個上司頂住，今次要我地３個女仔自己頂哂，當然喇，見客已經不再是什麼的難度，不過背住既壓力比以往大，反而變成一個負累

未出發前２日突然感冒，初初仲以為係H1N1，拿拿聲去睇醫生，好彩唔係．．諗住抖一日應該會好返喇，點知上到機開始唔掂，個鼻塞到抖唔到氣，再加上不足既睡眠，真係好難捱，個人辛苦到極點，跟住連續既會議令我想起就怕，但都要撐住，一定唔可以俾客見到個殘樣，夜晚點謝都可以，但日頭都要死撐

好多謝同事們既照顧，芬妮晚上捱聽我既咳聲，又俾水我飲，仲要頂住唔可以俾我傳染到，真係萬分感激，露比每早的暖暖飲料，令我深感溫暖，仲有佢支紫花油，無暈底都係靠佢，亞瑋既爛笑話，令我病都病得有笑容．．．我都仲記得昏迷前既一幕，多謝你們！！

可惜露比都難逃一劫，上年暈倒事件今年又發生，又係我扶住佢，不過今次有哂經驗，已經無再騰雞，但點都好，唔想再有下一次囉．．．哈

回來後又再努力工作，要大大力加油，再戰下個月既電子展！！