Day 2 @ 11102006

唔知點解咁攰呢？我已經瞓咗好多，加上今個月有大半個月都唔舒服，我真係好辛苦呀！

我而家每日返屋企都好似行屍走肉咁，我尋日用咗個半鐘返屋企，冇聽歌、又冇睇雜誌，行得超慢，總之，45分鐘嘅行程，我用咗double時間。下晝因為太攰的關係，上咗巴士唔願落車，結果入咗華富，真係無聊。

我唔可以比自己頹落去，日日都覺得唔舒服，我最終知道咗個原因，既然係咁，我真係要好好調理番個身體，無可能要我頭暈、頭痛咁耐。下個星期前一定要去睇中醫。

浪費時間，對我來說就等於燃燒生命。

由細至大，我屋企人都教我，自己嘅事係要自己做，做事要負責任，要為自己嘅將來打算，想過點樣嘅生活，而家就要努力。身為女仔，唔好諗住可以靠男人，因為男人係信唔過。不過，我一直都好想信我身邊嘅人，我以為我唔會遇到唔好嘅男仔，不過，其實我都已經遇到幾個，佢哋唔係唔好，只不過，係對我冇責任心。無論工作同學業，佢哋都好叻，不過，亦因為呢個原因，佢哋對我就冇嗰種責任。

我唔開心，因為我今日好唔舒服，我自己入咗醫院，跟住又自己返屋企。之前我打咗廿幾三十次電話比一個人，不過佢唔聽。我最憎人哋唔聽電話，到後來，呢個人知我唔舒服，滿口擔心、關心之詞，不過，到最後，佢唔會探你，因為，佢要踼波。我估，就算有一日，我真係就死，呢個人都未必會有咩改變。第一，佢未必會聽電話，第二，聽到之後，佢根本唔敢同公司講，我有屋企人响醫院，我可唔可以走先。

我响度同我所有朋友講，有一日，如果我真係有咩事，真係唔駛諗住通知呢個人，因為呢個人係世界上最自私嘅一個人，而我，亦都冇諗住再尊重呢個人，因為，唔需要。

我的愛，在今天已耗盡。