網誌分類：心's 心情 |
期待已久的「死亡筆記：昨後的名字」終於上映了，昨日第一天放工便跑去看。好興奮！雖然中段有D長，但「L」的表現實在......太可愛了！
由於APM同Times Square都無位，所以去了九龍灣百老匯(即淘大)。看完戲、食飽飽、飲埋野，都11點多了。眼見有28號巴士，以前自己返樂華都係搭佢，咪立即跳上車羅，話晒咁耐無搭，咪重溫下羅。點知佢一駛便入了九龍灣，大鑊！！因為通常D車入得九龍灣都返唔到我屋企，之後佢地多數會行機場隧道。立即recall memory：「究竟以前放工搭咩車架！？28號究竟點行架！？」好可惜，我只係記得當年係樂華邊個巴士站搭車同自己會係亞皆老街球場落車，至於邊架車，一D都recall唔到。
最終，出左隧道佢轉左落九龍城碼頭，當然就立刻落車啦。下車後，雖然已近12時，但我決定行番屋企。其實我都幾鍾意一個人係條街度慢慢走，好relax，所以有時返屋企都會早少少下車行番去，尤其是晚上，有點涼風，真是寫意！
有兩條路可以選，結果選了條長點點的。點知正想過馬路時，突然有人大大聲高呼我全名。回頭一看，原來是幾個中學同學，並正等待另一名同學下樓。由於我與那名同學在中學時代曾無故地被容許為緋聞情侶(到宜家你問我，我都唔知發生過咩事)，所以佢地劈頭第一句就開我玩笑，問我點解在他家下來、又唔怪知得佢咁耐都唔下樓啦、攪咩前後腳呀……
當佢地知道我搭錯車時，更立刻大笑我：「好心你啦！幾十歲人，返屋企都搭錯車！！有小巴你唔搭，101又咁多車，咁多你揀，你偏走去搭28號，儍下儍下咁……」其實，我真係好少同佢地聯絡，因為大家的生活方式都幾唔同，雖然咁耐無見，但朋友間個種感覺同感情就仍然存在，以上的對話令我覺得好warm。(其實嚴格來說都不是對話，我一直都只是係度儍笑！)
最後，緋聞同學都下樓了，我都返屋企了……
可能今次搭錯車都係上天的巧妙安排呢！！
