網誌分類：未分類 |
結婚後我最擔心既事終於發生左啦,唔係同老公感情有問題,亦唔係個仔有問題,而係我地既財政問題,其實一早就出現左財政既問題,只不過每次都可以挽救到...
熹熹出左世幾個月到佢就已經話唔想做嗰份工啦,當時我以為佢只係一段時間唔做野啫,以我地既積蓄應該冇問題既,點知佢足足半年都冇做野呀,我每次問佢都係話搵唔到,搵唔啱,但係佢有冇諗過啲錢係唔會等你架,一直都冇工返既話,我地就會好快冇錢架啦,就算大人唔食,個仔都要食啦,奶粉,尿片樣樣都係錢嚟架,之後過左冇幾耐我地要搬屋啦,搬屋要裝修,要買新傢俬,仲有要買其他野,又要用錢啦,最後我地真係唔夠錢用啦,為一辦法就係將我地既強積金全部攞曬出嚟,再加上我媽咪幫我比裝修費,其實都可以唔駛我媽咪比錢我既,不過一嚟我唔可以話比媽咪聽我攞左強積金同我地冇錢,二嚟我可以當借住先,日後有錢再還比佢,咁我就可以留多啲錢用啦,因為我唔知佢幾時先搵到工呀!搞好曬所有野啦,搬咪屋啦,佢都仲未有野做架,我記得佢應該係由熹熹4個月大到啦至08年11月到都係仲未有野做架,我都唔記得佢係由幾時開始有野做啦,不過佢啱啱做返野嗰時都唔穩定架,份份工都做唔長既,唔係話人工低就係話辛苦,講真丫,有咩工係唔辛苦架,所以嗰時就算佢有返工都冇用,我地啲錢都差唔多用曬啦,好彩有新年利是頂住先,之後佢終於搵到工啦,雖然人工唔係多,不過都要做住先架啦!
初初我以為佢有工返我地既生活會好啲啦,但係原來都唔係架,我地每個月都唔夠錢用架,開支真係咁大咩,要交租啦,交水,電,媒啦,仲要幫佢找咭數啦,又要買奶粉,尿片等等...,一直都儲唔到錢架,不過就算係咁都唔緊要,因為佢人工唔多,遲啲搵份人工高啲既工先再儲錢囉,最大既問題係佢好大使,佢從來都冇諗過會冇錢架,點解呀,因為佢冇錢會係信用咭提款,咁樣信用咭條數咪越來越大囉,之前我地個聯名戶口仲有錢嗰時,佢都成日攞錢架啦,又冇話比我聽喎,到我想用錢嗰時先發覺裡面冇錢或者少左錢,最終就係冇曬錢!
早排我信用咭比人盜用左幾千蚊,嗰個人覺得對我唔住又驚我報警所以還返錢比我,不過因為佢有啲係現金卷,所以還唔曬全數,咁都冇計啦,我冇多餘錢去還呢筆數呀,我話左比我細佬聽,之後佢借左$5000比我還錢,我諗諗下不如將熹熹啲利是錢攞出嚟還咪佢條咭數啦,後來又遲遲未還,搞到又冇錢用啦,咁點呢,就係將熹熹既利是變成家用,而我嗰筆就還左先,連熹熹既錢都用咪啦,如果用曬熹熹啲錢之後,我地真係一蚊都冇啦,到時真係要訓街啦,好彩到而家仲未要訓街,之後佢係7月8日又冇做野啦,唉......我地嗰段日子點過呢,就係用佢所有出既糧同我生日既利是再加哥哥補比熹熹既滿月利是一直用到佢再返工,不過都係唔夠用,逼於無奈要再係信用咭提款同我賣左個袋,都係啱啱夠用到佢出糧咋,因為佢只返左幾日工,出既糧唔多,所以都唔係好夠用架,而家先月頭咋,但係啲錢已經所剩無己啦,都唔知點算好,而家我地每日都唔可以用超過$100先可以用到佢10月出糧,希望10月我地會鬆動啲啦!唉......
以前既我係唔會擔心錢既問題架,因為我之前份工搵得多,而我又儲到錢,就算係以前我都從未擔心過,由細到大都未試過好似而家咁窮架,我細佬最清楚我以前係點架,佢知道我而家咁樣,佢都話有啲擔心我呀,而家既我係每日都要寫低用左幾多錢,數下仲有幾多錢可以用,我真係唔明點解我會係咁架,係我條命生成咁丫,定係我選擇錯誤呢,係咪我一時衝動既決定搞到自己變成咁呢?點解佢可以一啲都唔擔心冇錢生活架呢,仲可以諗有錢要買咩,要去邊到玩,我唔係一個貪錢既人,但係至少都要有兩餐食掛,仲有個仔呢,佢第時返學點算呀,我最擔心就係個仔,之前我話我去返工,佢話唔好叫我揍仔,早知我當時就唔辭職啦,起碼我自己都可以養到我個仔丫!希望佢唔好睇到呢篇野呀!
