當肥仔學人寫小說（四）

續上回。
那個甚麼《飄浮》的故事，到最後，又係寫唔完。
一年之後。Year 2暑假。
過去一年，試追三個女子，一個同學一個街外人另一個就師妹。
同學，追唔到之餘，兼搞到不歡而散（只因我小家）。
街外人，追唔到，和平收場（但我一樣有小家）。
師妹，其實我冇表白，就鳴金收兵。
可以預計，那一個暑假，在攝氏34度之下，我內心有多焦灼。
那個暑假，其實要用來準備畢業論文，但我就用來寫小說。剛巧見到一張由中大港大合辦的第24屆青年文學獎海報，10月才截止，心想有個deadline，應該寫得完。
於是，我由7月尾開始寫，寫到截止交件前兩天才搞掂。
期間，我冇構思過畢業論文、冇溝女、有上tuto但冇做準備，一味掛住寫。
原來，當一個人很純粹的想去完成一件事，那個過程，是頗型的（只是吸引不到任何人）。
我參加的是小說高級組（高級二字只是以年齡作劃分），字數合共2萬5千字左右，名字是《少年》。
《少年》，其實是俄國兜踎小說家杜斯妥也夫斯基一部不太出名的作品，我睇過——頭一百頁，實在悶到爆，加上中譯關係，那些乜乜斯基物物斯基的人物名，已經叫我想死——由於當時未想死住，所以唔再睇。
但那個簡潔的小說名，一用無妨。
題外話，杜生的小說和散文名，統統有型，如：《窮人》、《被侮辱與被損害的》、《白痴》、《罪與罰》、《冬天裡的夏日印象》……即使未睇過，但識得講書名，已經唔錯。
至於由中國以南肥仔書寫的《少年》，有三個主角，三個都係仔，故事冇乜起承轉合，只是某個暑假，三條友的一些小事。
唔知邊個話，大部分人寫處女小說，都例牌將自己的真實經歷寫埋落去，我亦唔例外，尤其寫到愛情部分，尤其亢奮。
基於乜都唔想嘥，所以那個《飄浮》故仔，又寫埋落去當「戲中戲」……
結果，贏咗。

                                                           #     #     #

10年後，有一點年歲了。期間，寫過一個1萬5千字的故事，又是參加比賽，輸咗；一個2千字的，登在某一期《突破》，還有一個超乞我憎的小說家作點評；一個由八個短篇合體而成的小說，寫了8萬字，已寫了七個，到最後一個，突然否定晒之前所寫的，決定唔X再寫；一個1萬字的變態小說，但寫寫吓變態唔到落去（但對於那1萬字，至今我依然覺得煞是OK）；一個2千字的濕鳩小說，用來參加一個濕鳩比賽，評判都很濕鳩，最終輸了，最濕鳩的原來是我；最後一個，2千字左右，寫來給某出版商看的……

                                                           #     #     #

可以咁講，我無時無刻都有股「氣」，一股想寫小說的氣，但可能真的俗務纏身，這股氣，往往成為一篤屁，化作輕煙，溜走，成為空氣，讓眾生享用。

所以，我正學習忍屁。（完）

下回預告：當肥仔學人拍片