人人得而FEE之

由出第一篇blog, 到今日, 已經四日.

我出blog 的原意好簡單, 由始至終亦都無變過: 就係希望將我所知o既事公開. 我亦從來無阻止任何人黎我呢度留言. 大家可能唔發現, 響我呢度留言o既人, 都會有部分係對我惡言相向, 我亦都知道, 出blog 可能會令到我成為朋黨的公敵. 對於無端端令自己成為被人指責的對象, 呢個情況當然非我所願, 但其實我真係無乜所謂. 我並唔係黎呢度交朋結友, 糾黨生事. 我只係希望, 我將呢件事帶到公眾面前, 公眾自行評論對錯. 每個人都有自己一套價值觀, 我果套同閣下果套唔同, 我只能講句: 道不同不相為謀! 但如果有人會用呢個理論, 去支持自己去做D傷天害理o既事, 我真係唔願意, 亦都無義務要容忍!

今日朋友告知, 有位無湘, 響露比o既blog 度留言, "唉...多人既地方自然多是非....我始終覺得唔清楚整件事既人唔應該隨便評論!有欠公平麻~~!"(引錄自: http://hk.myblog.yahoo.com/sleeperuby/article?mid=7796).

我當然唔係當事人(喵喵公仔), 我亦好慶幸我唔係佢! 事情發展至今, 憑良心講, 我所講o既事, 全部有根有據. 我有用腦去分析, 用眼去睇, 用心去感覺, 並非所謂"隨便評論".

以下係當日響寵物28度見到o既廣告 (呢個廣告, 我已經搵唔返, 但出黎工作近二十年, 我總算學會, 凡事要有兩手準備~):

而朋友響喵喵公仔個blog 留下私人回應, 亦都得到當事人回覆如下:

我絕對唔希望我冤枉好人, (但當然, 我亦唔希望各位冤枉我, 認為我係含血噴人之徒.) 所以如果有任何人, 覺得我所講o既有半句並非實情, 歡迎賜正. 我亦好樂意向當事人道歉 / 認錯 / 聲明澄清. 我在這個Y!Blog 費神思索發文, 並非在閉門造車. 既是公開的, 我就歡迎, 並且有心理準備接受任何人來我這裏作任何形式的發言──不論是支持我的觀點與否.

今日見到喵喵公仔響佢個blog 度o既網誌, 我響度諗, 我係咪太天真呢? 我曾經有想過, 當事人會反省, 覺今是而昨非. 但好明顯, 事實擺在眼前, 四字概之曰: 執迷不悟.

(哲學當中, 有一門語言邏輯學, 當中有一門頗大的課題, 叫思辯. 即是透過思考方法論證, 支持自己的觀點. 看完喵喵公仔的blog 之後, 全篇盲辯詭辯, 不知所云. 實在難忍.) 唯有作出以下回應:

1. 喵喵公仔一再強調, 我係個神秘人, 實在令我費解: 我並唔係咩神秘人, 你唔識我, 唔等於我神秘掛! 喵喵公仔, 你有興趣的話, 我可以同你交換電話號碼. 但交朋結友呢, 只怕不必啦! 我未致於孤獨得咁可憐, 要屈就自己. 我響度呼籲你公開我o既IP, 可以還我同肥腩媽一個公道!

2. 我係唔係神秘人, 同閣下o既所作所為, 又有咩關係? 閣下對我的身分有猜疑, 我歡迎你響我個blog 度求證. 但你只係不停響自己個blog 度發表, 話神秘人多番騷擾, 莫非純粹轉移視聽?

3. 閣下話我響你個blog 度鬧你, 想問下, 我鬧你D咩? 以下係我當日響你個blog 度所作出o既留言 (我一共是留了七次, 亦都係因為閣下將我列入黑名單, 我先要響呢度發表網誌):

既然你知道養貓要用好多錢,而你又知道自己無能力,點解唔一早幫佢地desex 呢?唔通你係想俾佢地生貓bb?D bb咁得意,你又會捨得將佢地賣出去o既?我見你賣個價錢都唔平tim架喎~

http://www.pet28.com/profile.asp?id=xx657

貓o既貓糧貓砂係要錢,但$3200真係夠好多街上o既貓貓用好多個月架喇...

請問, 係邊一字一句, 令你覺得我係辱罵你?

4. 唔知閣下有無發現, 你o既blog, 由開頭話找愛心貓奴, 到後來變成需要認養費, 再發展到依家, 你已經用左個賣字. 世間竟有如此單純o既人, 分唔清咩叫領養, 咩叫賣. 實在可笑! 賣同領養, 係兩種完全唔同概念, 唔係可以任由你胡亂混淆.

5. 既然閣下一心賣貓, 點解一開始會用領養二字呢? 如果咁都唔係呃人, 請問係咩?

6. 閣下話出面D貓販賣過萬一隻貓都會有人買. 首先, 人地咁做, 唔等於人地o岩囉. 有腦o既人會諗, 人地去跳樓, 我都唔會跟住去囉. 而且呢, 我無批評你"賣"得貴. (前提係, 你口口聲聲話係領養, 唔係賣) 對我黎講, 貓貓係生命, 唔係用價錢可以衡量的. 生命對我黎講, 係無價o既! 你果種價高者得的生命價值觀, 請恕我無法苟同. 你可以話每個人o既價值觀唔同, 無錯, 係! 但賣貓bb, 係關乎到另一個生命的個體, 你唔會以為唔關人事掛! 希望你唔好天真地以為, 你生BB, 個BB就係屬於你o既, 你有權帶佢黎, 亦有權帶佢走. 尤其, 生BB果個, 唔係閣下.

7. 對於閣下個人o既財政狀況, 我無興趣, 亦唔想知, 你有錢, 我亦唔會叫你分D俾我. 我有興趣o既係, 你大聲疾呼你好愛貓, 但又用窮作為賣貓的理由, 而同時呢, 又令人感覺到你生活富裕. 我唔知其他人點諗, 但我本人就相當好奇, 你有幾錫貓! 當然, 閣下亦有權又再重申, 你幾錫你的貓, 係你的事! 又或者把心一橫, 你都可以承認你幫貓生BB, 係想賺錢, 而唔係錫貓!

8. 好一句清者自清, 只可惜呢四個字被閣下濫用了. 閣下呢種, 係叫水洗都唔清. 要洗, 只怕滿盤清水都會愈洗愈污濁.

以上, 係對關於喵喵公仔的人生百態所作出o既回應! (http://hk.myblog.yahoo.com/karen-memory/article?mid=12445&prev=-1&next=12389)

我睇唔到人生百態, 只係見到一個可恥貓販的醜態, 亦只能嘆息一句: 人人得而FEE之!