龍鼓灘遊

唉...呢排好忙，連好好休息的時間都冇，更加係好耐冇同毛毛去玩了。呢個百忙之中龍鼓灘遊已經係6月29日事，但係玩完又冇時間寫blog，卒之又拖到今時今日先post出嚟。

本來星期日早上打完網球就諗住响屋企hea足一日，但見毛毛整古造怪趴响門口扮悶等出街，良心又過唔到自己嗰關，唉....都係前世久咗個衰女喇，於是就同honey一齊帶毛毛去龍鼓灘游水！

滿心期望，點知....個沙灘超級污漕！

數年前龍鼓灘開到一街都係燒烤場，又有魚釣，又有得玩香蕉船，想唔到，當呢度的燒烤場執得七七八八時，原來個海灘已經被污染得不堪入目，沙上佈滿垃圾，沙是黑色的，湧上沙灘的水亦是黑色的！！Oh My God！！仲差過上次去嗰個石灘！

我們當然冇俾毛毛下水啦。一時之間我們亦不知如何是好，咁唯有周圍行吓散吓步啦...毛毛就當然唔知發生咩事，因為佢連個海都未見到。

原來近沙灘尾有個「中華白海豚瞭望台」咁我地就由游水變咗行山喇。

海豚見唔到，換來的是一陣又一陣清風，都好啦，陰天得嚟又唔落雨，算係個天俾番少少獎勵我地。

玩咗一個多小時，咁呢個莽撞的星期日又完結了！下次都係去寵物泳池游吓水好啲！