驚魂記

上星期六，諗住天氣幾好，Money又叫到，又諗住想毛毛開心吓，就落去俾花花同毛毛仲有另一隻毛毛(呢隻係Money的朋友的金毛尋回犬)落去樓下公園玩，點知就出事了。

開頭都係好地地，响公園跑吓玩吓追逐吓咪好囉，見佢玩得咁開心，又唔跑出公園，咁我都開始放心放繩由佢自由活動，雖然唔係好滿意佢成日吠，都唔知响邊度學番嚟又唔知佢幾時開始一唔鐘意就吠，丟盡自已係友誼小姐的架，都算啦，呢啲嘢要慢慢教，總唔能夠下下都喝佢。

就响呢個大家都玩到咁上下時候，開始要抖一抖，毛毛就一隻狗咁企响遠處望住我，我叫佢返過嚟，佢就開始自己行咗出去公園，我惡夢就開始了...

正所謂「阿崩叫狗，越叫越走」，我都知我追個衰女佢實跑，所以我都冇拼命追佢，只係好似吊靴鬼咁跟响佢後面，心想一有機會就捉番住佢，點知試咗兩次都捉唔實，而毛毛更開始加快腳步，一下子就標咗出馬路。Oh my God！

呢次真係嚇死我。我手上又冇零食，又冇玩具可以引番毛毛過嚟，眼見兩邊行車線都有小巴駛過來，我嚇得不知如何是好，又唔可以追，又唔可以嚇，更加唔可以由得毛毛自己行，我唯有跟住佢响馬路行，一路叫佢，一路望住啲車，怕毛毛被車撞親；十數秒好像過了十小時，我個心跳到快要爆炸一樣。

小巴都慢了下來。毛毛最後都過了對面行人路，還一臉悠然自得地一路行，一路行。我不敢再追她，怕她又再衝出馬路，唯有嘴裡不停喊着她，叫她回來，毛毛也會望一望我，然後又繼續向前行。

跟了一會，她開始放慢腳步，我立即往前一手捉住佢！搞掂！

死毛毛吖！禁不住我起手狠狠的打了她數下。打她是因為她不聽話，打她是因為她不知死活，打她是因為我緊張她。回頭一望原來Money在我後面，真係唔好意思，次次同Money去玩都麻煩到佢。

回到公園，便立即收拾東西要扯個衰女返屋企。毛毛都好像知道自己闖禍，一路上都低頭快走，不敢正面望着我。回到家裡，send番個SMS俾Money講聲唔好意思，又再麻煩人地幫我睇狗，跟住便立即告知毛爸發生何事，嚇得毛爸魂不附體，都不知幾擔心，並下令以後毛毛响街唔可以放繩，就這樣，毛毛失去落街玩波的機會了。

點解花花唔會走咗去，金毛尋回犬毛毛更加係聽話到不得了，唯獨是毛毛，總係每次落街玩都唔聽話，永遠唔會自動跟人，永遠係玩玩吓波都竟然可以丟低個波走咗去。為咗令毛毛玩得專心點，我常常都等到很晚才可帶她落街，讓她可以專心地玩，不會無端端玩玩吓就跑咗去，最怕毛毛太過熱情會嚇親小孩子。

有時望着頑皮的毛毛，我真的擔心，終有一天，我會失去佢。