蘇梅島6天之旅 - Day 4

蘇梅島6日5夜之旅 - Day 4

今日join咗half-day trip，11點先出發，又可以瞓晏啲lu...好開心！

兜埋其他酒店join half-day trip的遊客之後，出發！

第一站：睇大笨象

認住呢間公司，就係佢地載我地睇大象，半路中途幫我哋映完相之後，敲詐咗我哋$400Baht，收到錢先至載我哋返去....算啦，肉隨針板上，....唯有當買啲蕉俾隻象食啦！T_T...

第二站：睇阿公 (Hinta) 阿媽石 (Hinyai)

唔駛問，一睇就知點解叫阿公阿媽石！

唉....男人.....

座擁無敵海景，好靚。值得一去。

睇完就去食佢地安排的傳統泰餐。唔好問食咩，你知啦，呢啲餐求求其其求食飽就算。

第三站：睇猴子摘椰子

聽導遊講，响泰國，馬騮係跟死一個主人的，第二個人講隻馬騮係唔會聽你話的！所以摘椰子係自己主人先會叫得聽話。

呢隻馬騮唔好以為佢好好玩，當時其實佢好兇，唔敢同佢映相...

第四站：睇老虎同其他動物show + 參觀水族館

我以後唔睇老虎Show，當初以為睇吓佢地點生活，原來係睇佢地做show，要佢地跳火圈，行鋼線...，唔聽話就打佢哋，咁樣對老虎太殘忍了。

發生了一段小插曲：本來係有一隻豹出來表演，但隻豹太兇唔聽話，馴獸師都搞佢唔掂，咁唯有隻豹退回後台了！見馴獸師雖然手執皮鞭，但對隻豹唔聽話都有點避忌，可想而知，隻豹發起惡上嚟都幾恐怖...

Show完後，俾$100Baht(每隻動物計)可以同動物影相。

Honey好鐘意雀仔...

我呢隻水獺BB好得意：仲食緊奶。好Cute哩！

Honey想同老虎影相，要貴啲，$500Baht！隻老虎...真到好像假的一樣...摸住佢，實在真係有啲騰雞...

水族館同香港的海X公園差不多，不過地方暗啲同埋多咗啲其他地方如阿瑪遜河的魚。

小丑魚在海葵裡沖涼...

第五站：廟宇參觀，內裡有一個不化的憎人乾屍(為示尊重，不便拍照)

尾站：睇瀑布 (Namuang Waterfall)

當然，想睇一個又大又高的瀑布係冇免費午餐的，各位先要拾級而上，到達一定的高度才可欣賞美景！幸好今天沒有下雨，否則便不可以上山睇瀑布了。

欲窮千里目，更上一層樓...Honey加油！

呢個Namuang Waterfall的確係好靚...枉我咁辛苦爬上嚟都係值得！

呢個瀑布仲可以俾人跳落去游吓水，不過我哋冇游，得外國遊客跳落去游。

玩完了！五點幾番到酒店。剛巧見到酒店門口有串燒，即刻買嚟醫肚。

好味！不過呢啲檔口唔係長擺的，賣完就收，得十幾廿串，所以見到就要快啲買喇。

班狗狗見到我哋買串燒，第一時間圍住我哋，只可惜我哋買得一串，不能夠同佢哋分甘同味呢！」

不過佢哋實在好friendly。

今晚有免費的晚餐，因為酒店free我哋一餐buffet，今晚响酒店Spice Island 食泰菜，好味呀！好有水準，環境亦好，又有歌舞表演。都話响泰國都係食番泰國嘢好味啲！

飯後，到海邊走走：又大又黃又矇矓的月亮，好有feel....

呵呵...酒店原來有地圖攞，响香港搵咗好耐都搵唔到蘇梅島地圖，可能蘇梅島唔係好大的緣故，...一於攞番本先。下次可以借俾朋友或者自用。

今日又完滿結束！明天又可以Hea了，爭取最後一日Hea番夠本！