結婚戒指

尋日終於決定咗隻結婚戒指啦,好靚嫁,我第一眼見到已經好鍾意....

其實我地星期一已經出去睇戒指,而我第一次見到呢隻戒指款係响另一間鋪頭,當時行過無意間見到,就被佢吸引,跟住就緊係第一時間衝入去睇啦,果時我已經愛不釋手,仲問咗好多嘢同攞埋咭片,個心已經諗住扑鎚....點知,當我未來老公仔打電話問咗佢表姊一d嘢之後,佢表姊就叫我地去佢訂果間鋪頭睇下先,因爲果到d款多d同平d喎,咁我地又見响附近,咪過去睇下囉.....

去到之後,睇咗好多都唔啱(因爲當時個心淨係掛住果隻戒指....)突然,我地竟然見到一隻一模一樣嘅戒指,即刻開心到暈,我唔肯放低,死都話要呢隻(雖然我間唔中都有攞起其他款話...."呢隻都幾靚喎",不過,我都係想揾d其他款黎襯托我呢隻係最靚,太過份~~~)不過,我地都冇即刻決定,因爲.......

因爲有一段小插曲導致我地可能冇辦法用呢對戒指,就係......手指寸,唉,我未來老公仔嘅手指實在太肥美,當我地量手指寸嘅時候,我.....8.5 or 9(而家決定用8.5,因爲緊d好過鬆,如果到時做咗出黎唔啱都可以撐大,d師傅話撐大好過縮細喎),而佢....24,超大隻囉,差唔多我嘅3倍,果到d人話唔知改唔改到,要問下師傅,所以我地要返去等電話....心急死人,成晚都諗住隻戒指呀,好驚會唔得,不過好好彩,佢地覆咗話可以改,所以尋日一放工就即刻衝去比deposit,好嘢~~~

而家真係好心急呀,我地一定要响影相之前攞到,因爲仲要拎去鑲石,時間好緊急,一定要帶埋佢去影相呀