常言道，「不熟不做」，貨源有門路，揀料就無難度；成本控制好，定價唔使高；設計夠時髦，財源自然滾滾到。
上文繞個圈想說的，是時裝店 chapel'老闆楊偉雄（ Luke）打滾時裝零售界十多年，繼而轉戰生產和批發，再創自家品牌的經驗。今年九月在尖沙咀加連威老道開設三千多呎兩層高旗艦店的 Luke，上週六再下一城，於同一條街開多間二千多呎大鋪，現於廣州和香港各有四間 chapel'分店的他，誓要搶做 H&M式時裝快餐本地薑！
先來格一格價吧！一件男裝恤衫， izzue定價三百多元無走雞， chapel'一百五十元有交易；一件 PU仿皮褸， K-2正售六百多元， chapel'只賣三百二十元。 chapel'所有貨品大多百幾二百蚊，而且店中除了男、女裝衫，還有飾物、鞋等風格一致的平價配飾讓客人買來襯衫，只要掏出五、六百元，客人大可在此徹底裝身。因此每逢週末， chapel'都堆滿客人。
現場便見一位約廿歲的客人，拿着最新上架的熊熊頸巾愛不釋手道：「呢度賣嘅衫好得意呀，質地又好，最重要係價錢非常合理。」
時裝老手重振旗鼓
作為包羅萬有的一站式時裝店， chapel'這個江山能於短時間就站穩陣腳，全靠老闆 Luke一點一滴的經驗累積而成。十二年前， Luke已於油麻地獨資開設「肥員外雜貨」，專賣外國板仔衫，後夥拍友人合資，以「 B-Sound」和「 Take it easy」的名字開店，高峰期一共擁有十四家分店。直至日本潮牌 A Bathing Ape登陸， hip hop服飾市場被分薄，生意大減，加上與友人在經營上意見不合，最後索性將店鋪關門大吉。
之後幾年， Luke曾開設計公司替時裝品牌如 Lee和 Wrangler開發新品牌及副線，真正接觸到製衣廠的生產流程；其後又將戰線移師廣州，自行設計 T-shirt做批發。○七年開始， Luke正式創立零售品牌 chapel'，售賣自家設計，以簡約為主的服飾。
Luke先於廣州開了兩家分店小試牛刀，發現客人反應不俗，遂於去年九月回歸香港，並殺入時裝重地銅鑼灣百德新街一幢舊樓的三樓開鋪。「呢個鋪原本係間地產鋪，我見個露台好靚，對面又有 agnes b.等大牌子，於是攞廿萬俾原先個租客搬，就當頂咗間鋪，現時月租兩萬多，當係宣傳費都抵啦！」 Luke說。然而當時 Luke將價錢定為成本的六至九倍，一件衫動輒數百元，拍得住 izzue；加上店鋪並非設於地鋪，不少客人都望而卻步，生意不太理想。
三個月後， Luke狠下心腸於尖沙咀漆咸道南開設 chapel'散貨場，將定價調低至成本的二至三倍，「嗰時我都好掙扎，自己花咗成擔心機，花一大輪工夫整啲好有型嘅衫褲出嚟，點止值幾十蚊呀，不過定價太高就死路一條，無生意就點型都無用啦。」果然，價格一調低，去貨量狂升六倍， Luke於是索性將全線貨品售價以此作標準，重新定價。但由於該店租約期只有一年， Luke遂另尋新鋪址。適逢附近加連威老道的華美達酒店放租， Luke便立即租下地鋪連一樓做旗艦店，今年九月開張。
本地時裝狙擊手
十一月時 chapel'廣州和香港各有三間分店，開業兩年間已月賺五十多萬，十二月更於兩地各多開一間新店，令店鋪數目增至八間。 chapel'成功因素除了由於 Luke有時裝批發、零售和生產經驗，還因其出手快、狠、準。 Luke揀布在行，布料好與壞，一摸上手就知。 chapel'所用布料，都由俗稱「行街仔」的專業布料搜集員，每天到內地各個布料市場如廣州中大布匹市場，及中山沙溪布匹市場搜羅，務求把最新散貨出來的名廠「士多」（ stock）布料搶到手，「好多名牌子如 Polo、 Nautica都在內地設廠製衣，訂布時會預鬆啲，完成指定生產數量仍有一定餘布，呢啲餘布就叫 stock布，比正價布平一半 o架，但質地上乘，賣完就無，好搶手。」 Luke說。由於 chapel'在廣州有辦公室，「士多」布樣板到手後，同日即會進行各項質料檢定，如以熱水測試布料會否縮水甩色等，保證布料優質後，即日便會落單購買。
買布後，便進入設計階段， Luke請來香港及內地時裝設計學院畢業的設計師，他們都是後生仔女，設計出來的衫都頗能迎合年輕人口味。 Luke說：「我哋唔會直接抄款，啲款可以出得咁快，係因為我哋會將啲現有嘅設計元素稍作改動，例如同一款衫我哋可以換吓布料、顏色，又或將圓領變尖領，咁就變成另一個款啦，所以我哋每星期都有新貨出。」
替 chapel'生產衣物的，大都是相熟的中小型製衣廠， Luke說中小型廠製作樣辦，三日就能起辦，即日決定落貨的話，第二十三日便能起貨，令 chapel'的新貨不足一個月便能上架出售，而且每款衫生產數量由少至百多件至六、七百件都可以靈活配合，令店鋪去貨甚快，追上 H&M的時裝快餐文化。「若搵大廠生產，要七日先可以起辦，又要一季之前落單生產。」
決定快，製衣快，開鋪都要快。現時尖沙咀加連威老道的旗艦店對面，另一佔地兩層的新店，由簽租約到開幕只用了一個月，剛於上週六開張，實行以快刀搶攻聖誕、新年的零售旺季。
「加記」小霸王
Luke選擇加連威老道連開兩鋪，皆因他對該區有深厚的情意結，十多年前其 hip hop王國也於此地起家。 Luke憶起此地的興衰時說：「當年貿發局向旅客推銷呢條街時，都用出入口成衣做賣點，但後來呢啲店出現太多假貨，被海關掃蕩，就慢慢沒落；之後到運動服飾鋪興起，首先係 MVP，跟住係 CPU、 Adidas等，希望打造一條類似波鞋街的主題購物街，不過都係做唔起，各運動鋪都逐一退出。咁多年來，無變嘅係一早已買落鋪位嘅龍城化妝品、基督教會堂同連鎖出入口成衣店 Westwood，其他鋪就不斷易手，真正留低嘅只有平價女裝衫。」做時裝前的 Luke曾當過 Adidas的櫥窗設計師，對包裝設計甚為在行，即使 chapel'產品售價便宜，但以黑、白、灰為主調的裝潢，卻令它甚有「 Initial」等大牌子的味道。
兩個星期前，加連威老道出現一間店鋪裝潢、飾物包裝跟 chapel'非常相似的時裝店，面對這隻抄襲貓， Luke直言：「條街多一間新鋪，就等於多一個敵人，所以我先快快手租埋對面個鋪，搶多啲市場佔有率；不過開心嘅係，好嘢先至有人抄嘅！」
開業資料（ 08年 9月）
租金︰$300,000*
裝修︰$160,000
入貨︰$150,000^
雜費︰$10,000
總投資︰$620,000
*香港首間店鋪為銅鑼灣分店，包括 1個月上期、 3個月按金及頂手費
^生產成本及部分飾物入貨成本
營業資料（ 09年 11月）
營業額︰$2,200,000*
租金︰$408,000*
人工︰$322,000#
入貨︰$880,000^
雜費︰$60,000
盈利︰$530,000
*包括 3間香港分店和 3間廣州分店
#包括 32位全職員工及 15位兼職員工
^生產成本及部分飾物入貨成本
15ea501.JPG
seeeeepw.JPG
SSL10483.jpg
