香港之旅

仲有兩日零九個鐘就返去加拿大了

今次返黎最好玩都係女朋友喺度嗰陣

佢返黎之前嗰日﹐我已經整好咗佢個行程表囉

講真一個禮拜又點夠佢用呢

離島都冇同佢去....>.<

不過大致上普及嘅地方都去過﹕屯門(我以前住嘅地方﹐中學同小學)﹐深水埗黃金﹐旺角潮流&始創﹐沙田市中心﹐屯門市中心﹐觀塘APM﹐尖沙嘴﹐銅鑼灣﹐海洋公園﹐中環上山頂睇夜景同埋蠟像館﹐加埋我住緊嘅元朗啦

                                                             我女朋友

                                                        傻瓜瞄瞄 (好得意^o^)

忙到最後嗰日四點半鐘機﹐一點嘅時候仲喺元朗嘅千色廣場買衫買鞋﹐哈哈

每日就行街行到腳傷損晒....>.<

不過都唔知下次幾時先再返黎香港了﹐都唔係太鐘意香港啲人﹐太過現實﹐咁當然有啲係例外啦﹐就好似我堂細妹﹐上個星期五係我三十歲生日(我都知我老了...>.<) 我堂細妹就請咗一日假陪我去海洋公園玩(上次同女朋友未玩晒﹐諗住玩多次嘛)﹐我都明香港人揾錢辛苦(一日假都幾多錢架)﹐所以我都好開心呢個呀妹咁錫我呢個大唔透嘅呀哥。 玩完就約埋佢家姐(我堂家姐)去銅鑼灣食日本餐﹐不過都唔係食得多(一黎我又開始減肥中啦)﹐所以都唔係叫太多嘢食。多謝晒堂家姐先﹐因為呢餐係家姐請嘅。

                                               兩個女仔加埋減肥中嘅我﹐都夠晒食囉

但都要多謝埋堂細妹﹐事關食飯之前﹐細妹帶咗我去銅鑼灣Sogo嘅超市﹐佢話要買啲零食同公仔麵返屋企﹐咁我就睇下有乜嘢零食拎返去加拿大俾我女朋友食啦﹐梗住就揀咗佢上次鐘意食嘅紅豆&綠茶糖﹐仲有上次冇買到嘅特大嘅紅豆糖。當俾錢嘅時候﹐呀妹話唔駛啦﹐但我話買俾我女朋友食架﹐佢話無所謂啦﹐話請我女朋友食。多謝你呀妹。

                                                             我女朋友鐘意食嘅糖

                                                                上次冇買到﹐今次可以知道好唔好食啦

                                                   蜜桃味都係第一次試咋﹐呀妹仲要我講返佢知呢隻好唔好味

隔日堂細妹再叫我出去﹐話請我食飯慶祝返我生日﹐問我去邊度食﹐但我諗黎諗去都唔知有邊度有好嘢食﹐講下講下呀妹話不如去深井食燒鵝﹐咁我又諗下諗下﹐加拿大我嗰邊冇燒鵝食喎﹐咁就去咗深井嘅裕記食晚飯。間嘢話就話賣晒廣告﹐但係都唔係咁好食﹐早知叫散餐會好好多。但我最開心就係細妹好錫我囉。

星期六晚會同呀妹見多一次(返去前)﹐應該去唱K/睇戲啩﹐正期待中。。。