#450----再嚟, 足球雜談

又講足球; 先嚟我最喜愛嘅 3 間球會嘅其中 2 間嘅轉會消息 轉呀轉, 轉呀轉:

富咸由東倫敦球會韋斯咸買入現年 27 歲嘅前鋒森莫拉 (Zanora, 下圖左) 及同為 27 歲嘅加納國腳右後衛彭素爾 (Pantsil, 下圖右). 估計兩人合共轉會費約 6 百萬英鎊.

與此同時, 富咸讓現年 33 歲嘅塞爾維亞中堅史提芬奴域 (Stefanovic, 下圖左) 轉投英冠球隊諾域治, 轉會費未有公佈. 同時外借現年 19 歲右後衛年青小將奧梅素斯 (Omozusi, 下圖右) 予諾域治一整個 08~09 球季.

另外, 富咸現年 21 歲嘅後備守門員巴迪斯達 (Batista, 下圖) 返回葡萄牙效力國內大球會士砵亭, 轉會費為 15 萬歐元.

阿仙奴方面, 一如 #422 所料, 上屆季尾盛傳會離隊嘅球員: 法明尼 (Fiamini); 列文 (Lehmann); 基拔圖施華 (Gilberto Silva) 及希比 (Hleb) 終於先後離去....

現年 27 歲, 白俄羅斯最傑出足球員希比 (Hleb), 落實以一千一百八十萬英鎊轉投西班牙球會巴塞隆拿.

前阿仙奴隊長及巴西國腳, 現年 31 歲嘅中場基拔圖施華亦結束 6 年 "槍手" 歲月, 以一百萬英鎊轉投希臘球會彭拿典奈高斯.  

感謝兩人多年嚟為阿仙奴貢獻, 希望佢哋一切順利啦.

再嚟講講佢哋嘅季前備戰 & 熱身賽:

阿仙奴季前熱身賽, 7 月 19 日首戰作客以 2:1 撃敗英乙球隊班列特, 繼而 7 月 22 日作客匈牙利球會 Szombathelyi 打和 1:1. 新球員方面, 藍斯 (Ramsey) 兩仗均正選上陣; 墨西哥小將前鋒韋拿 (Vela) 則於次仗正選上陣. 拿斯利 (Nasri) 則仍未正式披甲. 

富咸季前熱身賽展示出良好狀態; 7 月 15 日先作客以 2:0 擊敗英乙球隊修安聯; 7 月 19 日更於主場以 3:1 擊敗蘇格蘭盟主些路迪. 6 名新兵均有先後上陣, 現時球隊當來亞洲身在南韓, 進行另一輪季前熱身賽備戰.

諾定咸森林展開德國集訓之旅, 7 月 18 日季前熱身賽首戰以 2:1 撃敗東道主球隊奧芬巴克, 而新球員高爾 (Andy Cole, 下圖); 安疏爾 (Earnshaw) 及蒙斯 (Moussi) 均有上陣. 稍後森林會回到主場, 面對兩支英超球會愛華頓及新特蘭.

講完~~Bye !!