殘奧馬術 day 1

今朝 (應該話噚晚) 2:50 起身﹐ 3:15 出門口﹐3:55 去到場館﹐印象中未試過咁早出門口。

因為比集合時間早咗半個鐘﹐所以趁機周圍影o下相﹐不過因為保安/保密理由﹐負責人叫我哋完左殘奧先擺相上 blog。

4:30 開始 briefing﹐5:00 食早餐﹐5:30 開工。首先我哋要安裝一 d 指示牌﹐又係 d 手板眼見工夫。之後就自發檢查一下噚日套嘅椅套有無甩漏﹐6:30 左右就企喺自己嘅崗位等待 VIP 嘅來臨。

我嘅崗位係負責守住最佳位置果三行﹐只畀通行證有特別標記嘅 VIP 坐。不過可能 d 大粒佬噚晚去咗北京睇開幕式﹐所以今朝除咗特首同幾個司﹑局長由 7:30 坐到 8:00 之外﹐只有一個芬蘭 VIP 坐過一陣。

雖然工作量超低﹐不過個太陽真係唔係講笑﹐7:30 左右就開始曬。曬足三個鐘﹐好彩有帶帽﹐同埋搽咗太陽油﹐總算頂得住。

因為我大部份時間都係守住無人坐嘅座位﹐所以我可以睇比賽睇得好清楚 (部大會攝影機直頭喺我隔離)。不過我真係唔識睇點叫好點叫唔好﹐都幾悶﹐加上畀個太陽乾煎緊﹐所以無好集中咁由頭到尾睇完一個比賽﹐心裡面都只係想佢快 d 完。

雖然唔多識睇﹐不過都有 d 得意嘢。原來有 d 選手除咗比賽馬之外﹐重會搵人帶多隻馬入場企定定﹐話用嚟穩定比賽馬嘅情緒喎。又見過有馬一路比賽一路開大﹐比賽完之後要搵專人嚟執。

今朝嘅比賽都好順利﹐10:30 左右就完成。而負責人都好體諒我哋﹐好快就叫我哋返入室內﹐檢討完之後 12:00 就收工。佢重畀咗兩張免費飯飛我哋 (我哋 suppose 無呢 d 福利)﹐叫我哋試試免費飯盒同自己畀錢買嘅質素有咩分別。確實係要畀錢嘅質素好 d﹐不過都唔係話差好遠。

有咗今日嘅經驗﹐聽朝可以遲半個鐘起身。