殘奧馬術結束

噚晚順利完成所有比賽﹐所以今日保安就鬆懈晒。之前因為要安檢﹐所以要撘兩程車先可以到場館。今日無咗安檢﹐一程車就得。

今日主要執嘢﹐準備撤離。不過大家都想喺執笠之前影多 d 相﹐未開工之前負責人先畀時間我哋影相。平時我哋唔可以落比賽區﹐今日因為無食 Q 把守﹐可以喺比賽區大影特影﹐重入埋去裁判坐嘅涼亭添。

影左一陣﹐有隻馬入左比賽區﹐相信係一般晨操。我哋都好希望可以同隻馬影相﹐女騎手好友善咁停低隻馬畀我哋摸同影相。隻馬來自丹麥﹐叫 ALFARVAD APRIL Z﹐13 歲﹐噚晚攞咗面銅牌。APRIL 好乖﹐騎手叫佢停﹐佢真係完全唔郁﹐亦無發出叫聲。毛色好靚﹐顏色又均勻﹐好好摸。負責人見到有馬入嚟﹐就叫我哋走﹐我哋喺比賽區外再影咗一陣相先正式開工。

我哋用咗唔夠一個鐘就做完嘢﹐大家就將咁多日各自影嘅相用 card reader 抄上電腦﹐然後抄落各自嘅手指度。呢個方法好好﹐唔駛燒碟又唔駛 send email﹐就可以喺最短嘅時間內得到所有人嘅所有相。

之後我哋就一齊去新城市廣場飲茶﹐回味番咁多日所發生嘅事﹐真係非常開心。聽日就係 last day﹐真係好唔捨得。