再來!!

嗱嗱嗱, 其實我今日本來真係想抖抖ga, 雖然之前都約咗大頭妹同小妹佢地唱K, 不過都係諗住去hea下就算(因為我已經失哂聲), 唱完再去行下之前拍過畢打嘅地方嚟個場景遊啦. 殊不知係點半鐘忽然Yoyo急call出funz...... 但係個funz係兩點半喺奧海城開始lor = =' 攪到我要放小妹佢地飛機...

神速執好D眼耳口鼻飛出門口, 兩點4先碌到出太子, 時間緊迫, 唯有犧牲廿蚊打的落去啦!! 點知... 個funz祥仔出唔夠15 mins.就要閃... 因為趕住返廠. 出完個funz之後我地又一班人去咗tea. 食到最後淨返我, Yoyo, JJ同Bobby家姐喺度傾偈, 講返之前兩日發生過嘅事, 真係笑到我地幾個趴哂喺張枱度, 我, Yoyo同JJ仲要笑到差D內傷... 又笑完玩完一輪, hea到咁上下時間, 我地都係時間搭MTR過中環玩外景探班啦~

此乃"正橋"作品(不過係拎Yoyo部相機影!

其實尋日都已經知佢今日有外景ga la, 終於膽粗粗咁問祥嫂佢地會喺邊樹拍, 不過初初祥嫂講我知佢地喺Harvey Nichols附近拍. 不過我呢D草根階層, 真係唔多知D名店響邊樹... 最終攪到去到中環再要麻煩Bobby家姐再幫我地問路, 好彩後尾一講, 我地個個叮一聲就知道哂 - 原來喺煤氣燈哥度呀~~~

知道確實地點, 跟住再接埋小妹同大頭妹, 我地即刻9秒9由東方文華酒店哥邊奔過去. 去到路口時咁啱就見到祥嫂, 當堂個心都定哂, 祥嫂見到我地一個二個跑到隻dog咁都笑我地, 跟住佢都係好nice咁問我地食唔食野(因為佢帶阿仔去買老麥買野食同老豆一齊開餐), 之後就指住街尾話比我地知祥仔喺車裡面啦.

橫掂都跑開, 都真係唔爭在跑埋上斜. 祥仔喺車裡面遠一遠見到我地幾個, 其實我望到佢有兩秒呆一呆, 我諗緊佢當時嘅潛台詞會唔會係 : 又係你班友!? 見足3日啦wor... 跟住佢先好施施然落車, 但係望到我地氣來氣喘個樣, 佢都忍唔住問 : 你地跑嚟ga? 不過當時我地除咗點頭之外, 都無人出到聲答到佢個問題啦~ haha~

不過我地好勁, 就算喘住氣, 我地都掛住拎D相呀碟呀同新鮮出爐嘅TBB週刊過佢簽. 原來TBB週刊連佢自己都未睇, 一簽完, 佢就已經問我地可唔可以借比佢睇啦. 嘩~ 視帝你叫到wor, 就算係身份證都要比你睇啦下話!
點知呢個Yoyo就一馬當先爭住借本野比祥仔睇(家陣你係咪想佢摸多你本書幾野先?)!

你睇佢睇得幾入神! 不過奈何睇睇下又比人叫下佢, 跟住又叫佢去換衫埋位咁, 實情佢睇咗幾多成篇內文都無人知...

雖然知道佢呢3日都係勁唔夠瞓, 但係佢就依然得戚, 開完餐換埋衫都仲要行嚟行去, 一時又slow motion比你地慢慢影, 一時又扮比狗仔隊跟咁真係唔知佢攪乜...

喺祥仔去咗開工哥時, 我地就轉陣同Julia傾偈啦, 佢仲爆咗好多好笑野過我地知tim~ 至於係乜, 就梗係唔講得~ 呢個又係我地幾個之間嘅秘密~ 今次場口仲有包公tim, 不過都算拍得快啦, 應該最多都係拍咗1粒鐘, 包公行過時我都忍唔住要同佢say hi兼讚下佢囝囝得意(真ga!!).

見到祥仔換完衫, 咁即係佢又要走啦, 正當我地成班都依依不捨之際, 忽然正橋話 : 阿model埋位吖唔該! 跟住祥仔就真係好自動波咁行埋一邊擺埋post! 跟住, 就比我影到下面張相啦~~

呢張, 暫時係我傻瓜機劣作中最滿意嘅"佳作"!! 雖然影哥時我無開閃光燈, 但係本住唔好蝕嘅心態, 真係影咗先算, 點知比我影到呢張相, 真係開心死我(今次專業哥班好似有少少老貓燒鬚呀)~ 

不過我發現, 其實祥仔對住我地哥時都幾真性情, 雖然聽完Julia講之後真係有少少覺得佢係精神分裂, 不過只要肯用佢另一個"真面目"的話對我地的話, 咁都幾好吖~ 點解我會咁講呢? 係因為一單發生喺影相時候嘅小插曲. 事源兩位專業攝影師 - 即係Yoyo同細黎生, 佢兩個都好堅持話要著閃光燈去影呢大黎生呢位"model", 不過阿model又覺得唔開閃光燈攞街燈個feel好D wor(其實我都咁諗), 但係兩位攝影師又覺得唔落燈D相會大noise wor. 後尾阿model抵唔住頸叫細黎生比部相機佢睇個setting, 跟住兩位就光圈快門白平衡咁拗一大爛餐... 真係攪到我聽都聽唔切... 哥一刻, 我地個個除咗笑之外, 就真係"叮"一聲咁諗起一樣野 : 原來佢兩父子平時係咁樣溝通ga!!
後尾去食野哥時講返起呢單野, Yoyo仲話佢兩父子拗到好似想打交一樣, 真係笑到我碌地!!

嗱嗱嗱, 大家見到呢張相千祈唔好狂呼住, 呢張係JJ嘅作品嚟, 佢部相機影出嚟個feel真係好正, 我本身真係幾鍾意Pansonic D機影出嚟嘅呢隻黃, 當年第一部貴野digital就係用Pansonic, 但係用咗一排覺得佢個防手震功能流流地, 所以換機時轉咗做Canon, 不過真係多得JJ補飛, 呢張相影得佢好型呢!!

係我衰, 本應祥仔都要走ga la, 不過我又提醒咗佢地要玩"自拍", 跟住一行半打人(including me)就逐個捉住佢玩"自拍"啦... 仲要叫佢一齊揸機, 真係個個影返張先心息(hehe, 我有兩張~)!

探班團都要嚟張合照, 不過我地係影緊塊鏡lor, wahaha~

食完野之後本來想話去埋麥當勞道哥邊個外景場行下, 不過睇睇錶, 好似都好夜, 最終都無去到. 但係畢打街, 就真係點都要去一去, 趁人少少, 仲可以對住個路版喪影tim~

遠道由台灣而來, 呢位朋友點都要影啦~

恨咗同個"路牌"影相好耐啦~

呢位小姐呀, 初初又死都唔肯影, 見到我地影得咁開心, 古古惑惑咁走埋嚟話 : 我又影!

一連3日嘅視帝貼身追蹤就咁就完咗啦... 真係好唔捨得, 唔知幾時先再有機會見到祥仔同呢班好朋友啦!! 我會好掛住你地ga~~