08海浪公園十月全城哈佬喂

好攰呀~~ 尋日(19號), 其實即係剛剛, 去完呢個海浪公園嘅全成哈佬喂, 玩到一身都散哂呀~ 雖然之前哥日都好夜先瞓, 不過呢個係我最期待嘅funz, 正所謂"玩"能醫百病, 少少唔夠瞓, 難唔到我嘅~

飛一早就買好, 不過約地點, 就約到星期5晚都未約好, 約咗成晚, 叫做約好啦. 點知講講下, 原來阿智無人理, 佢個好兄弟小龍完全無搵過佢...... 咁唯有再約過, 就係咁, Dan, 花, Peggy, 我同阿智, 就約哂喺灣仔等兼食D野先入去, 太陽哥哥就等得我地食完野先喺車站等.

入到去啦入到去啦~ 好緊張呀~

話咗4點半好喺門口等, 嗱嗱臨入去玩返夠唔好蝕ga la, 小龍佢地係要遲到, 就咁就蝕咗半粒鐘有多!!

入去前嚟張大合照先~

向對面山出發~!! (又嚟"鐵窗邊緣")

比我發現咗一個秘密, 原來小龍畏高ga~ 叫佢搭纜車好似叫佢去死咁, 超攪笑~

好鍾意呢張相, 睇下4個靚女幾靚~ (未玩之前咪靚lor, 玩完之後就... 哼哼哼~)

第一間玩嘅鬼屋 - 迷幻空間

呢個玩完出嚟我已經成頭大汗...... 真係好驚ga~ 玩過山車我都無咁驚...... (汗...)

第一張同鬼影嘅相, 隻鬼叫我唔好震, 其實我唔係驚佢, 只係我玩完對上間鬼屋仲未驚完ja......

有一單野一定要講一講, 完全唔關D鬼事. 只係阿花有豔遇呀~~ 其實我都唔係好清楚之前發生咩事, 只係知道阿花話肚餓走咗去買雞蛋仔, 買買下嘅途中, 就比班叔叔起哄. 原來佢同個整雞蛋仔嘅男仔"溝通"緊, 個男仔就比我地玩到佢面紅, 阿花就好似隻女色狼咁. 阿花, 你比D女仔嘅矜持嚟睇下先得ga...... 下面就係傳說中嘅"雞蛋仔王子"啦~ 都好難怪阿花唔心動嘅, 都ok好樣吖~

仲有片睇tim, 同場加影, 哥哥08哈佬喂之死亡體驗, 其實佢係比我地推咗佢上台玩遊戲~ (裡面有少少兒童不宜請見諒~)

另外仲有爆笑traffic jam. 有一班"鬼", 佢地喺手指套咗D鐵, 當佢地踩roller跟住"扇"落個地度哥時, 就會擦出火花, 跟住佢地就諗住玩花式"通坑渠", 點知有人失手, jam住咗喺D人嘅褲浪之下~

相實在太多啦, 如果大家有興趣可以去我個相簿度睇下ga~ 老實講, 今次係我第一次去哈佬喂, 之前阿花成日話佢會好驚, 點知到頭來, 一圍人裡面最驚哥個原來係我, 最大膽哥個竟然係最細哥個lor...... 全程我已經2仔底死跟阿智同太陽哥哥, 不過原來我係信錯人, 因為佢兩個見到我個驚樣, 都要嚇埋我一份, 最慘係後尾小龍都加入戰團lor...... 你地正衰人嚟ga!!

不過講開又講, 唔知係咪放盡喉嚨咁嚟嗌兼成頭大汗, 雖然把聲拆咗, 但係個人真係真當堂relax哂, 早排唔開心嘅野好似唔記得哂咁. 同佢地去玩真係幾開心ga, 約定咗下年再去, 不過下次再去如果佢地可以準時比錢就最好啦~~ haha~

後記 : 年年都話去呢個哈佬喂嘅遊客會同D"鬼"有衝突, 今日終於見識到. 其實我地無見哂成件事, 行到去哥時淨係聽到有把好大聲嘅男聲喺度炒媽拆蟹爆哂粗, 聽清楚D原來鬧緊其中一隻"鬼". 鬧咩? 咪就係鬧隻"鬼"嚇親佢條女lor...... 唉, 哥哥仔, 比你叫得哈佬喂, 嚟到呢度玩, 就預咗比人嚇ga la, D鬼唔嚇你, 你就話人揸流灘, 嚇你又話人好嚇你. 你估你咁樣走去鬧人好型咩, 你哥D叫樣衰ja, 唔嚇得嘅就唔好嚟玩!! D港男成日都話D港女唔得, 你地D港男又何嘗得過吖......