無奈......

眼睇住09年頭, 各大物流公司不停咁炒人. 人心惶惶咗大半年, 尋日公司終於都做野啦. 其實真係估唔到, 呢班咁要面嘅老細, 到最終都要向現實低頭... 不過最估唔到嘅, 係減薪連裁員一次過出現......

我絕對承認, 我對呢家人係有極度嘅偏見, 不過, 你亦絕對唔怪得我! 所謂嘅"共渡時艱", 之前好景嘅時候, 又真係唔見你年尾分多一頭半個月比所有人. 一味就淨係識將D錢周圍fing, 逢初二十六同阿關二哥整餐豐富嘅燒肉, 都唔諗住久唔久請一班同事食一餐半餐. 一係就哥D端午呀中秋呀, 拜神哥時最多整多隻雞之外, 就一人比一隻唔知喺邊度買嘅糭或者一人一個月餅. 係呀, 你無聽錯呀, 係一隻糉同一個月餅咁大把呀... 大佬, 我個拖頭都一人比張美心糭卷或者美心月餅卷啦...... 新年流流, 大老細比廿蚊開工利士, 真係多謝哂!! 最過份嘅係最鍾意借哂D錢比其他公司做生意...... 好景哥時就叫會計部唔好追人找數, 60日數期變90, 90就再變百二!! 不過, 我都好明白有時做生意嘅野, 無得計較咁多. 老細鍾意比埋錢人做生意係人地嘅事, 都唔輪到我呢D小薯仔去理. 學我舅母話齋, 天下烏鴉一樣黑, 一個咁仁慈嘅老細係唔適合做老細, 如果唔係間公司真係聽執. 老細搵到錢, 唔係天經地義一定會分比你地. 我好明白呢樣野, 比著我係老細, 可能我都會係咁.

不過, 坦白講句, 有時做野, 大口氣D講, 人工低唔緊要. 最緊要做得開心, 工作環境好啫. 但係呢度... 可以喺30幾度嘅高溫下壞一個月冷氣, 唔開口叫救命, 都唔會有人諗住攞D風扇上嚟比我地頂住先. 一個月女嘅可以分到3捲廁紙, 男嘅得兩捲, 唔夠用呀, 一係問同事攞lor, 再唔係, 自己帶屋企哥D返嚟啦! 我頭頂支光管壞咗年幾, 都無人諗住去換. 張櫈爛咗, 攪到打字釣住對手打到手痛, 都可以叫你坐住先... 一個廁所5格得3格用得, 沖水系統隨時壞全部手動. 最經典莫過於D電腦, 如果唔係多得當日話要轉system, 相信而家Windows 95/98都仲有得你用...... 睇到呢度, 睇怕應該有人笑緊我自己攞嚟衰, 咁嘅公司, 之前又唔係未做過, 咁都比人氹咗返嚟, 真係自作孽......

好啦, 到咗今時今日, 你生意跌啦, 就叫我同你共渡時艱. 咁當日香港通脹, 樣樣都貴嘅時候, 邊個同我共渡時艱呀請問!? 話大老細有個project做咗年幾, 推出嚟如果"work"嘅話就對每個dept.都好. 年尾就會再review返扣咗哥5%. 係lor, 你"work"就話囉, 你唔work哥時咁我點呀? 再比你扣多5%同你共渡時艱多一次呀? 呢D數字遊戲, 就算比你加返我5%, 最終咪又係level, 我始終都係under paid ga. 你睇下人地街外有經驗哥D收緊幾錢人工, 點都過一萬掛. 我? 我咪唯有又係講一句自己唔好彩lor, 我喺呢間公司個level, 永遠都係唔值一萬銀人工ga la... 一班咁嘅老細, 唔該比一個理由我等可以信佢!!

呢班咁嘅老細, 要炒起人上嚟, 佢地真係唔會諗下人地喺呢度做咗幾耐, 當日點樣為呢間公司...... 今次喺我呢邊office炒咗4個, 其中有兩個真係最唔捨得......

小二, 你大個仔啦, 真係要生性ga la. 第日結咗婚唔同你而家咁樣, 你真係要咩起成頭家ga, 記得唔好再咁懶, 的起心肝, 正正經經做人啦, 我都望你有出人頭地嘅一日嘅!!

老闆, 最最最唔捨得係你呀, 當年初初入嚟呢間公司哥時我無有識死, 成日走嚟寥你傾偈. 難得你又唔嫌我煩嫌我低B, 仲教咗我咁多野. 希望你好快就可以重新開始, Take Care la!!

炒完人, 個個都已經無哂心機返工. 而我, 呢個moment唯有臨住隻就死嘅牛嚟搵馬, 如果各位真係有咩好路數, 不妨介紹下啦!!

願各位至少都平平安安過埋09年!!