好緊張呀~

唔知係咪最近公司無野做兼且又悶得滯, 攪到呢排我多咗追劇(忽然間覺得自己好似C9...). 呢排仲要勁多好劇, 真係追少集我即晚都要dl返嚟睇!

今日, 就為咗一套《畢打自己人》, 我就以9秒9極速收工返歸. 點解我咁緊張? 因為今日社長余家昇(黎耀祥)同埋老總(毛舜筠)嘅感情線浮面啦! 其實我由《同事三分親》開始, 已經好鍾意睇呢班演員做嘅處境劇ga la, 初初以為女主角由關詠荷轉咗做毛舜筠會唔慣. 不過, 原來呢套《畢打自己人》比《同事三分親》更好睇~  可能早排《巾幗梟雄》黎耀祥演嘅柴九呢個角色大熱, 所以連帶佢有份演嘅呢套《畢打自己人》個劇情都有變. 本應講大哥(歐錦堂)會追返個前妻, 即係阿老總. 但係而家就180度走咗去講老總同阿社長wor.

雖然呢《畢打自己人》係一套輕鬆嘅處景劇, 不過喺選角方面真係一D都唔馬虎, 有貴為影后嘅毛舜筠, 而且毛姐嘅演技都已經係公認咗出色, 我自己睇咗幾集, 就已經完全投入咗呢套原班人馬做嘅新劇. 我自己真係超仰慕殷賞呢個角色, 有料有膽色. 有起咩事上嚟, 都飛身撐咗自己人先!

至於社長呢, 其實我初初真係唔太鍾意呢個角色ga, 雖然佢成日都滿面笑容, 不過就成隻笑面虎咁奸奸地, 好似比佢食咗都唔知發生咩事咁. 不過後尾睇睇下, 原來佢同老總撞埋哥時D戲真係好過癮, 佢兩個成日一人一句, 你"腰"下我我"腰"下你, 雖然聽落句句好似有骨咁, 但係對方又會收到大家真正想講乜, 哥種默契真係好正! 我諗喺現實生活真係唔知搵到幾多呢D咁樣嘅人.

其實有時唔好話追劇無益, 就好似呢套《畢打自己人》咁,  雖然劇情有時有D誇, 但係哥D辦公室政治真係好到肉! 同事與同事, 部門同部門之間哥種鈎心鬥角. 低有低級玩, 高有高級去見招拆招. 雖然, 始終都係拍劇, 世界上有時有D野真係唔會有咁啱得咁橋嘅, 不過, 呢D點都話哂係辦公室生存方法嚟吖!

今日呢集真係睇得我好緊張~ 臨尾哥隻"愛得太遲", 睇住個幕聽住呢隻歌, 哥一下真係揼心... 唉, 社長呀社長, 既然係諗住送返對鞋比老總嘅話, 點解當晚又唔肯同老總講呢... 真係激死人啦~ 如果無記唔添食嘅話, 如無意外仲有40集做. 希望D編劇真係會比返個happy ending我睇啦, 話哂都處景劇, 唔好又整埋哂D無厘頭嘅結局至好呀!!