0314 - 行山樂

星期六天氣真的好到不得了, 可惜水皮腸胃有事, 所以唔可以出嚟一齊玩, 我就同左家姐同兒甥女由薄扶林水塘行上山頂喇!  相約早上等, 我家姐係一個非常守時既人, 所以我地全部都係早到呀!

今天都幾多人行山, 可能係天氣好的關係吧! 兩個小朋友都好開心, 不過行斜路對我家姐嚟講真係有難度, 好多時都要休息, 又話唔可以一路行一路講野喎, 真係比佢激死! 不過有時一家人咁去行吓山都係一件快樂事嚟既!

沿途家姐都有幫我影相, 不過技術就真係麻麻, 連jeremy咁容易影佢都捕捉唔到架, 厲害嗎?  我地用左個半鐘上到山頂, 天氣真係好好, 所以好多人同狗, 亦有好多人誠邀我兩個小朋友合照, 不過無計啦, 人地咁讚賞佢地,  我做媽媽既都好開心!  食左個quick lunch就沿路返歸, 落山無咁多人, 可能個個係山頂玩完就係山頂走人啦!

回途中遇見一隻狼狗同一隻大笨狗, 不過佢地既主人話隻狼狗好惡, 而且兩隻都會吠, 叫我先行, 經過佢地身邊就真係狂吠同想走埋嚟, 不過可能而家都慣晒保護佢地, 所以都唔係好驚, 不過我家姐同兒甥女就真係唔係幾慣, 行得好慢同好緊張, 睇見佢地都幾好笑, 幸好我兩個小朋友都無吠同好鎮定, 好快就行過佢地喇!

去到次次坐的士都好麻煩既地方, 又係上唔到囉, 等左好多架先有得上呀! 不過天氣咁好同佢地出去行吓就咩都值啦! 星期日又係我休息同做家務既日子, 不過就算得我自己, 我仍然帶左兩個小朋友去玩波波, 細佬而家真係超鍾意玩, 佢玩到連水都唔飲呀, 真係比佢激死!

而家去睇吓我家姐既作品啦!

呢張算係好好喇!

呢張睇得清楚嘛?

本來係想同壹壹影, 點知變左咁?!

唯有一家再影啦!

想同細佬影, 點知又變成.......!

終於影番張!

唔知點解可以影成咁既呢?

壹壹完全無望鏡頭架!

呢張盲輪到細佬囉!

未試過影到細佬咁既樣, 我家姐真係好厲害!

全家都無一個望鏡頭佢都照影架!

呢張係我影既, 睇吓壹壹幾得意!

星期日沖完涼幫壹壹影, 係咪都幾靚呀! 仲肥左咁架!