返學第3, 4, 5日 (N1)

為免遲d失憶, 快快趣記低埋第3,4,5日o既返學情況先

因為mama要返工, 以下都係靠阿嫲同埋老師講返比我知(真係好想可以自己湊佢返學放學呢....)

4-11-2009 (wed) 第三日返學

呢日仍然係返10點放11點, 阿嫲湊皓皓返到學校, 皓皓見到阿嫲要走就喊la, 阿嫲本來想o係課室門口睇下佢, 但比老師趕走, 叫佢一個鐘後先o黎接....其實咁都好ge, 如果比皓皓見到, 佢一定更加喊住要抱...到放學時, 阿嫲話皓皓一見到佢就勁喊, 係喊到喘哂氣o個隻...真係好淒涼...但問返老師, 老師話其實阿嫲走左冇幾耐皓皓就停左喊, 只係間唔中喊幾聲, 都有同其他同學仔一齊玩tim.

5-11-2009 (thur) 第四日返學

呢日仲係返10點放11點, 皓皓去到學校門口就喊la但放學時反而冇喊

老師打o黎話比mami 知, 皓皓食茶點時嘔.....應該係喊得太勁o既同時又食野, 所以先會嘔...嘔到衫褲都要老師幫佢換過....

比起尋日, 放學時冇喊可以話係有d進步la, 阿嫲仲話皓皓有同老師講"byebye老師, 聽日見"

5-11-2009 (fri) 第五日返學

呢日開始返2個鐘la, 返10點放12點...

阿嫲話佢幫皓皓換衫時佢已經開始唔開心la, 係咁話"阿嫲抱....阿嫲抱..."阿嫲為左令人開心d就早d帶佢去公園玩一陣先返學...但係一去到學校附近, 皓皓就開始喊la, 話要"返屋企..."但都冇計la都係要返學...入到去老師話"你忍唔忍心比我吖?" 咁阿嫲就走la

放學時老師都係話其實皓皓好快就停左喊, 有一齊唱歌仔, 但係就冇一齊玩遊戲....放學時咩住書包同其他同學仔一齊坐o係櫈仔度等阿嫲, 見到阿嫲時喊左幾聲...

**************************************************************

睇o黎皓皓豬仲未適應返學呢....咁都係ge, 出世到而家都未離開過我地, 無端端得佢自己去一個陌生地方, 全部都係陌生人....得2歲....點都會驚驚ge...

希望仔仔可以快d適應, 日日開開心心咁上學去(好似o係屋企咁開心hahaha)