白車

等我記一記先，
昨天是我第二次坐白車入急症室，
兩次都係陪坐，
兩次都係送姑姑入院。

前天晚上，姑姑條腰已經痛得雙腳發不到力，
連洗白白都洗唔到，以我認識佢咁多年，
通常去到咁既程度，第二日多數都要入院，
比著以前佢有保險，就要入院住十幾日，
日日做物理治療先攪得掂。

如我所料，昨天早上，
姑姑不但整個背脊都痛得要命，
連去廁所也發唔到力，
無辦法，唯有幫佢Call白車入威記，
白車黎到，三名醫護人員上黎搬姑姑落樓，
我都驚七仔見到媽媽比人搬走會嚇親佢，
所以都事先同佢講：媽媽唔舒服，Ｄ哥哥黎帶媽媽去睇醫生，我地好快返黎架啦。
雖然講定，但係當Ｄ醫護由房搬姑姑出黎落樓既時候，
七仔驚到震晒。

去到醫院，等都唔洗等，好快就有醫生黎睇佢，
可能個醫生見姑姑都知自己係乜野原因痛，
所以佢只係講左句：係羅，你自己都知自己事，你都唔打算做手術架啦，
咁唔好攪咁多野啦，我幫你打支止痛針算啦，攞Ｄ藥返去，同埋轉介你去睇物理治療，你等一等。

我同姑姑都呆一呆，吓，唔係呀麻，佢行唔到喎，
你唔係諗住打完針叫佢走呀???????
咁我就同佢講：因為佢（姑姑）返屋企要上一層樓梯，佢依家咁樣，
佢都行唔到上樓喎，可唔可以比佢入院，第二日做埋物理治療先走。
佢木口木面咁答我：吓，都同佢打左止痛針啦。
我就繼續同佢講：但係就算比佢係到休息一陣，佢今晚都係唔到上樓梯架喎。
佢繼續答我：吓，無得咁架喎。
我：............................。

打完針，痛到爆既姑姑，就係咁瞓左差唔多三粒鐘，
正想試一試起身落床既時候，
有位人兄走埋黎問：你地想點呀？
我話：佢想試下起身落地..........
我話都未講完，
佢一手就將姑姑將床靠背的位置拉起，
姑姑立即痛得尖叫，
我已經立即大叫：你做乜呀？佢條腰有事.........
又係我話都未講完之際，
個位人兄又一手將已經比佢拉起左既床又放返低，
姑姑又再面容扭曲多一次，
咁樣拉上拉落，前後只係三秒。
我已經「慶」到爆，即刻同佢講：
你都問一問人地有乜事先啦，條腰有事既人係唔可以亂郁佢....。
Ｏ個位人兄仲要撐，話：我見佢本來將床都斜斜地......
我忍唔住繼續鬧：佢本身斜斜地係無問題，但係你唔可以突然同咁快拉起佢。
好彩，最後Ｏ個位人兄都識得講對唔住，
如果唔係我實投訴爆佢！

幸好，有對夫婦同位姊妹黎幫我地，
揸車送我地返屋企，仲攞張櫈落黎幫我手抬返姑姑上樓，
今朝姑姑已好好多，揸住支行山杖，自己都行得到，
又無長短腳，背部的肌肉都放鬆左好多。
希望休息埋今日會好好多啦。