四大掌佬見面

不經不覺, 籌備婚事己經有7個月喇~ 好快就會踏入365日的倒數! 時間好充裕, 籌備工作亦算幾順利~ 要提早book既都book哂了, 接下來下一個項目應該會係租衫租禮服喇掛? 不過都要等我11月中攪掂埋個車牌先有時間去慢慢睇~

上星期六我哋終於都安排咗四大掌佬見面食晚飯~ 或者因為大家都係住同區的,所以感覺都幾同聲同氣~ 全程都係閒話家常, 並無提及我哋婚事上既事情~ 我最想就係咁呀~~~ 

呼~~~ 感覺上好似又完成多一個項目咁~ 以後唔駛再比阿媽鵝我仲未安排未來襯家見面認識喇~

好多人都覺得攪結婚唔駛預早咁多, 一年都夠哂時間去準備~ 係既~ 唔理大攪定細攪, 花幾耐時間去攪都係視在人為~ 我覺得如果唔需要買樓、修裝, 淨係攪一個婚禮的確一年就夠喇~ 不過有時眼見好多新人為攪結婚瑣碎事而忙到甩哂碌, 情緒&感情都受影響, 又經常會用"煩"哩個字去形容攪結婚.....其實結婚本來係好開心既事, 係兩個人結合並且係新生活既開始, 兩人應該係開心咁迎接 big day既來臨, 而唔係比d 煩瑣既籌備工作攪壞心情~~ 所以我情願早少少慢慢去攪, 就算遇到咩問題,都仲有時間去解決嘛~

因為我一向都對婚禮、對婚姻都充滿憧憬的~ 雖然無人敢話自己既婚禮可以做到100分,令所有人都咁滿意, 但至少我會想合力攪一個令我倆都滿意既婚禮, 留下美好既回憶.... 有要求就當然要識得比其他人早少少去準備, 不然book唔到想要既公司/ 工作人員咁就無得怪人喇~ 現階段我哋都籌備得幾順利, 感覺輕鬆良好~ 不過荷包就好難可以輕鬆得到! 出年就可以開始打造我哋既理想中的家~ 希望萬事如意,唔好超支~~