28/8更新4：「黑仔HAPPY仔」尋家

最新消息：(28/8)

好耐都冇update番Happy仔嘅消息，真係唔好意思tim..因為大契我哩排比較忙。sorry la.......

其實有一個好消息同一個唔係太好嘅消息。或者交番比Happy仔為大家報導下啦﹗

~~~~~~~~~~~~~~~~~~~

各位好，我Happy仔可以話已經搵到新主人，不過就未走得住。準備領養我嘅嗰兩位哥哥姐姐，之前帶咗我去見獸醫叔叔去檢查身體......(其實我都有dd驚呀﹗因為我都未去過)

點知.....個叔叔話我有小小病，又唔係好嚴重.......又唔係話好小事，要食兩個星期藥同打針咁囉........不過我估應該都好快無事卦？

如無意外，等我好番，我就可以同新主人番屋企lu......

係哩度......真係好多謝大家嘅關心同支持.....真係無以為報﹗

(大契：由於現時happy仔可以話已經有新主人，所以未得同意，我覺得我都係唔太方便披露太多病情，不過以我所知，Happy仔現時情況都好好，大家唔洗擔心.......)

___________________________________________________

4/8

各位親愛的朋友仔，又喺時候由我「happy仔」為大家講下我個近況嘞﹗

我而家有兩對好錫我嘅大契父母同細契父母。

大契父母就係「蛋糖荳媽」同「蛋糖荳爸」，而細契父母就係我而家嘅暫養父母﹗

我而家仍然暫住係細契嗰度，叫做過緊一d我發夢都會流口水嘅生活，因為都有好多朋友仔黎探我，而且仲同我玩tim....又抱抱我啦、又比餅餅我食。

有幾次大契都有黎探我，不過佢就冇乜手信，不過都ok la，黎陪我玩咗幾個鐘。

言談間，我聽到大細契都講開有人想領養我，但係都仲係聯絡同考慮緊﹗

我都唔係好明，我又咁乖又咁嗲﹗個個見到我又好鍾意我，但係點解都冇人接我返屋企喎﹗

雖然養wow wow真係要諗得好清楚，但係我都好想你地快d呀﹗我真係好想有自己嘅屋企、可以晚晚陪住你瞓、陪你玩、陪你睇電視......

(喂﹗大契，咩叫做電視呀？我好似未見過喎﹗食唔食得ga?)

仲有呀﹗細契喺上星期日仲帶我去玩tim.....嗰日佢地搞狗狗活動，所以仲特登帶埋我去散下心、開懷喪玩一番﹗不過我等咗好耐都唔見大契媽出現，原來之前嗰晚佢掛住同大契爸講長途電話到朝早六點幾，所以唔知醒﹗

不過都唔緊要啦﹗我嗰日都玩得好開心，個個都同我玩，又讚我，而且仲落水玩咗一輪tim.......不過第一次見到咁多wow wow同人，唔多唔小都有d d 緊張﹗不過我見大家都係後生仔女，一次生兩次熟啦﹗下次我一定玩得更開心﹗哈哈。真係期待下一次再去玩。

你地想唔想同我去玩呀？我真係好想有個好錫我嘅主人，日日夜夜都掛住我，時時刻刻都抱住我，等我唔洗再擔驚受怕。雖然我而家叫做比以前舒服咗，但係夜晚黑我都好想有人陪我瞓覺豬呀﹗你地真係鍾意我嘅話，就快d聯絡我大契媽啦﹗

____________________________________________

(30/7)

各位，又係「HAPPY仔」為大家報導嘅時候嘞。係星期二嘅時候，「蛋糖荳媽」嘅兩位朋友黎接我走，因為佢地話唔想我日曬雨淋喎。

知道佢地帶我出街，我就梗係好開心啦，當我架戰車黎接我之時，我一支箭咁沖上車，我起初以為去扮靚靚LA，但係點知架車行下行下，去到深井，我就諗：都唔係平時條路ge......我情急之下，我喊咗出黎，我好不安呀﹗究竟帶我去邊？係唔係唔要happy仔嘞？

大約過多半個鐘，我地終於落車la......之後我去到一間寵物店入面，仲有狗狗同我玩tim.....當嗰位朋友姐姐同我講話我會暫時住係lee度，我個心當堂只係諗：嘩﹗終於瞓覺會有冷氣la......」

~~~~~~~~~~~~~~~~~~~~~~~~~~~~~~

後記：

尋日，我都有去探happy仔，我地而家可以好肯定佢肛門位無問題，只是細個時剪尾剪得唔好。不過因為都有少少發炎，所以要食藥同搽藥膏，雖然我朋友已接happy仔，但其實都只可暫居，所以仍希望各位幫幫忙，睇下身邊有冇朋友想領養，我地保證絕不收分毫，只想happy仔有個溫暖的家！

大家可留言比我，我會盡快覆你。

30/7拍攝之相片:

______________________________________________

更新: (27/7)

今日，「蛋糖荳媽」帶咗佢兩位朋友黎探我，佢朋友係識狗隻護理嘅﹗

佢望過我偒口，話我應該係pat pat發炎，可能係因為早排落雨太勁，「up」住太耐。但係因為我都有小小痛同紅腫，我諗佢都唔係睇得好清楚。而看更姐姐就話因為早兩日有位靚太太比咗d消炎藥我食，所以好咗好多。

但係我聽到亞朋友話會暫養我，帶我去有冷氣嘅地方暫住，又可以同我玩﹗應該都好好呀﹗不過我仍然希望快d有好心人收養我啦﹗

~~~~~~~~~~~~~~~~~~~~~~~~~~~~~~~~~~~~~~~~~~

後記﹕主人聽到我朋友話想要黑仔，今日就立刻帶咗黑仔去睇醫生，同剪毛，不過可能因為剪毛時間太耐，話趕唔切去睇醫生，不過主人承諾會聽日帶佢去﹗

我朋友話黑仔傷口已經唔算太嚴重，但始終黑仔唔比我地睇，可能太痛。所以都係睇醫生好d，希望主人真係帶佢去睇啦﹗

看更姐姐仲話，好彩我地有朋友會接佢走，如果唔係主人下個星期就會帶黑仔去愛護動物協會，所以希望幫佢快d搵到主人呀。

最後~~~~~原來「黑仔」真名叫做「Happy 仔」呀﹗

Happy仔，加油呀﹗

_____________________________________________

(1)

你地好呀，我個名叫做「黑仔」，今年都有7歲，係曲架黎嘅。

但係而家想搵一個新主人，我嘅故事係……….

我原本同主人一齊住係元朗一間村屋地下嘅單位，我就住喺花園，都有間狗屋ga, 不過因為主人已經搬走，好似話係上樓喎﹗而家就只得我係舊屋，有看更姐姐得閒就入黎加水加糧比我(我主人一個星期都有黎探我 一兩 次嘅)，仲有一隻龜龜陪我，但係如果舊屋成功賣比其他人，我就冇得住lu. 所以就好想搵到新主人。

之前都試過話有人接我走，不過主人唔鍾意送我去狗場囉﹗

你地見到哩幾張相，係我新鄰居「蛋糖荳媽」幫我影，佢仲靜雞雞帶我去佢屋企幫我洗白白，咁當然看更姐姐都知啦﹗我成半年都冇洗白白同剪毛，雖然「蛋糖荳媽」話想幫我剪，但係又驚我主人唔鍾意，所以先冇剪之嘛﹗你地睇下我，其實我都好型仔ga……..

我識得sit sit，hand hand同反肚ga，而且仲好乖tim，又唔亂吠﹗

最衰就係「蛋糖荳媽」已經有三隻大狗狗，所以唔可以收養我﹗

請咁多位做下好心收留我啦﹗如果係舊屋賣出之前搵唔到新主人，我就會被強迫死亡﹗

不過，我有個秘密話比大家知，我耳仔有發炎同條尾尾有爛肉，有d係好耐以前爛過，再好番，又爛過咁囉，我好想有人好心帶我去睇醫生ga…..如果由「蛋糖荳媽」帶我去，主人就以為我搵到新主人ga la，咁就好麻煩，所以我真係想快d搵到真正嘅新主人，等佢帶我去睇醫生呀﹗

「蛋糖荳媽」希望透過看更姐姐同主人講，如果佢再唔理我個傷口，就會話佢虐蓄喎﹗但係又驚搞大件事而又未搵到新主人，我就被主人下令安樂死呀﹗快d救我呀﹗

唔該大家話我哩件事比多d人知呀﹗好心呀﹗多謝多謝﹗