Valse avec Bachir (Waltz with Bashir)

前晚睇完Valse avec Bachir,  係一套極少o既動畫紀錄片, 講述主角對於20多年前o既第五次中東戰爭已經唔係好記得, 所以到處搵返當年o既戰友, 重拾片段式o既記憶. 好有同感, 好多時當時明明o係身歷其景, 好有感覺, 覺得好難忘o既事, 到o左一定o既時間, 係會淡忘, 但一講到某d重點, 整件事又會立即重現你面前. 試問你o既初戀仲記得嗎?

第五次中東戰爭, 對於香港人, 又或者遠東地區o既人都唔知係咩事. 其實就係o係1982年以色列打黎巴嫩. 巴解, 穆斯林武裝派, 聯合國維持和平部隊, 呢d名詞成日會o係新聞聽到, 知道中東一直以o黎都不停打杖, 但我o地都係唔會主動去了解整件事. o係巴黎就會多好多機會接觸到, 因為法國不停接受當地o既難民. 就好似上年黎巴嫩又打扙, 法國派o左隻軍艦去接當地難民o黎法國住. 所以法國係有唔少阿拉伯人同猶太人, 尤其是巴黎.

用動畫做紀錄片好處係一定會有畫面. 好多時紀錄片訪問時, 一味影住受訪者講o野, 未必有咁多當時鏡頭. 動畫除o左一定會有鏡頭之外, 有時仲可以加d誇張諷刺, 更突出戰爭o既殘酷. 其中有一組鏡頭係影住軍隊想射一架私家車, 但射極都唔中, 旁邊o既人同建築物就遭殃, 我相信真實亦差唔多, 你估個個都係神射手咩? 另外仲有一個鏡頭比較難忘, 有兩個士兵o係坦克上面用機關槍不停向周圍掃射, 其中一個士兵因為望到腳下, 坦克裡面都係受o左傷就快死o既同伴, 於是就停o左冇射. 另一個就叫佢繼續射, 佢就問要射乜? 同伴答佢: 唔知o架, 總知任務就係要不停射. 戰爭就係咁!