死因裁判官被觸怒了

上星期四，我果然被抽中為陪審員，五人組成的陪審團當中，我應該是最年輕的。

這單case是關於一個癮君子在喜靈洲懲教所服刑期間因病入院，然後在一個多月後死去。因為死者是在服刑期間離世的，政府有需要對死者的家人作出合理的交待。

由於這是一宗死因裁決，故此不會有控辨雙方律師，盤問證人的工作便落在負責這案件的高級督察身上。此案件預計需要兩天的審訊，證人共有八位，而陪審團由四女一男組成。第一個證人是死者一個沒有聯絡多年的弟弟。第二個證人是在喜靈洲懲教所工作的什麼高級懲教所所長ｘ先生。開始時，ｘ先生問死因裁判官：「法官大人，我可以睇吓我本log book嗎？」

死因裁判官可能心情不太好，他急不及待明寸ｘ先生：「乜你唔係應該上庭之前睇哂同記熟咩，點解重要睇呀？」

ｘ先生可能知衰，即說：「係嘅，法官大人，請問你我可唔可以睇呢？」

法官都冇佢咁好氣：「睇啦，睇啦。」

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

高級督察Y先生問道：「請問你陳X係幾時被送入醫院？」

ｘ先生答：「2006年3月X日。」

高級督察Y先生再問：「咁陳X被送去邊間醫院？」

ｘ先生答：「瑪麗醫院。」

可能Y先生知道他答錯，所以說：「係唔係應該係伊利沙伯醫院呢？」

ｘ先生想了想，又看了看log book，然後說：「係瑪麗醫院。」

法官這時說道：「佢話係瑪麗醫院咪瑪麗醫院囉，你重乜幫佢呢？」

之後Y先生問：「咁請問陳X入院留醫後有冇轉到去其他醫院呢？」

ｘ先生說：「係冇嘅。」

幾個問題之後，Y先生問道：「陳X係幾時死同死响邊間醫院？」

ｘ先生答：「2006年4月X日。佢係死喺伊利沙伯醫院。」

此時，死因裁判官開始炮轟ｘ先生：「阿高級懲教所所長，你頭先話陳X入嘅係瑪麗醫院，之後話佢冇轉去其他醫院，咁點解佢會死响伊利沙伯醫院嘅呢？」

ｘ先生此時有點猶疑，頻頻翻看log book，然後答道：「法官，唔好意思，我睇錯咗，佢應該係入咗伊利沙伯醫院。」

死因裁判官聽後更激動的說：「一開始時又係你叫我比你睇log book，乜唔係應該開審前要睇熟咩。我比你睇，但係你睇住都講錯？」

ｘ先生即時道歉：「法官大人，唔好意思。」

死因裁判官：「咁佢係入咗去邊間醫院呀？」

ｘ先生：「伊利沙伯醫院。」

死因裁判官：「咁你最初係講邊間醫院呀？」

唔知ｘ先生係咪食錯藥，佢竟然話：「伊利沙伯醫院。」

個官今次真係被人激到上心口，大駡：「我同高級督察Y先生都聽到你話陳X入咗瑪麗醫院。好，我哋聽番錄音帶。」

擾攘了5分鐘後，法庭書記播出較早前的錄音內容，各人清晰聽到ｘ先生說「陳X係入咗瑪麗醫院」。今次ｘ先生真係百詞莫辯了。

死因裁判官又再潤他：「阿高級懲教所所長，你聽到自己講咩啦，你唔信我，唔信高級督察Y先生，你知唔知你浪費咗陪審團5分鐘時間去聽番錄音帶。」

今次ｘ先生終於向死因裁判官講出那三個字『對唔住』。

唉，呢個證人真係未訓醒，真係少炳呀。我都覺得個官鬧得佢好啱。好彩之後的證人作供都很順利，案件最終在下午可以有裁決。我被其他陪審員推選為陪審團主席，負責宣讀我們的裁決。最初，我們相信陳X是由於肺積水及胸腔腫脹而死的，屬於死於自然。

我賺了半天的假期之外亦賺了180元的津貼。

完了今次的case，我會有兩年的豁免。睇吓兩年後仲會唔會咁好彩被抽中。