意料之外

第二回

日期: 星期二

事件: 老闆召舊上司繼續第二日會議...舊上司話冇需要計劃, 因為佢決定辭職 (其實我同twins一個月前已知佢好大可能會跳糟到同行, 不過佢等緊總部confirm所以尚未辭職)...老闆問舊上司有冇同同行聯繫, 同行嘅舊高層有冇搵佢....舊上司話冇....老闆話佢星期三要飛, 下星期一先再同佢傾...

 第三回

日期: 星期五

事件: 當天早上我有客到, 老闆本來話佢唔喺香港唔會出席我地個會議, 點知佢突然返咗嚟仲嚟同個客打招呼.....下午同客食完飯返office check emails, 很震驚!!! 老闆出咗個email俾全公司, 話舊上司即時離開公司! 再過一秒, MD出email"提醒"大家有關公司資料機密性嘅守則...更精彩....我同twins偷偷到後樓梯打電話俾舊上司, 舊上司話唔方便講住, 同一時間另一"戰友"同事打嚟話老闆召集所有人上樓上開緊急會議...由於我而家搬咗去另一層, 唔應該喺自己部門嗰層出現(因我驚老闆會出嚟等電梯而奇怪我點解會喺度), 所以我"好醒"咁行上一層自己搭電梯, 點知.... 電梯門一開, 老闆, 廢人上司同佢個擦鞋"朋友"全部喺電梯入面!!! 廢人上司問我有朋友喺度做? 我唯有話係, 之後緊記自己要調查吓嗰層係"mud"公司!!! 只要我早或遲一秒, 我都唔會撞見班牛鬼蛇神!!!  我啲"戰友"同事事後知道都個個笑到傻咗, 但我除咗O咀就真係唔知可以有"mud"反應lor...至於個會議, 老闆交代公司發現舊上司辭職前一星期下載咗啲唔係佢工作需要嘅文件, 所以即時再見....

我地覺得難以置信, 因舊上司係醒目女, 況且要下載都一早做咗, 兼且最近某同事真係有咁做而被bye bye - 當時舊上司都認為佢好蠢....

晚上twins終於搵到舊上司....很恐怖....原來中午人事部, IT部同老闆一齊押佢執包袱, 中間唔俾其他同事同佢講嘢, 之後審佢一整日....雖然舊上司堅稱唔係跳糟 (因真係未落實), 但都唔信....然後話公司報咗警, 要跟佢返屋企查佢電腦, 最後IT同人事部真係上咗佢屋企, 強行re-format佢部電腦!!

我跟twins有以下討論:

- 肯定廢人上司有參與第一部份中傷舊上司...可能係報復我地, 可能係要減低我地勢力....

- 老闆咁相信廢人上司, 連一向信用嘅舊上司都唔信, 可能老闆同廢人上司其實係朋友一早認識!!!(佢地都來自英國)

- 亦有可能呢個係一個局, 公司跟本認為舊上司人工太貴, 所以所有都係一個局逼舊上司辭職, 藉故換血推佢下面啲平下屬上位頂上....

- 為求自保, 我地要忍住度氣假扮同廢人上司友好, 亦自私地不能教下屬太多嘢好使我地有利用價值...雖然相信佢地暫時唔敢郁我地 - 因為佢地要人做埋舊上司啲嘢, 亦要穩定軍心, 而且最近MD公開讚過我同twins幾次仲話會提名我地參加公司個gloal awards, 所以估計我地只要安靜工作都暫時冇事?!  不過, 都係小心啲好....走唔緊要, 但若走到個名臭晒就大件事, 因為我地行頭好窄, 消息好靈通...

好想返回兩年幾前, 當時我初初入公司, 我地部門相比而家好細, 但所有人都好"純"無雜質....嗰時返工真係好開心亦好放心....雖然工作時間較長, 但無辦公室政治亦覺"保"番晒....

究竟幾時先會雨過天晴???