眼睛去旅行：曼谷(2)完結篇

今次去曼谷，都冇乜諗過去邊度食野，去過咁多次，什麼建興咖喱蟹，唐人街的煲仔翅，MK的打邊爐，都已係可去可不去。

通常都係在邊間酒店住，就試下佢的西餐，不過之前睇過blog友三眼仔的介紹，今次就諗住要去Banyan Tree天台那間Vertigo，試下君臨天下一覽無遣的曼谷夜景之餘，又享受下二人世界的法國餐，真係諗起都好happy.

不過人算不如天算，結果都係去唔到Vertigo，原因說來話長，我星期四晚到曼谷，星期五早上就立即打電話去Vertigo訂位，訂左食第2輪，即晚上八點。

點知星期五果日黃昏就開始落狗屎咁大雨，真係落左車都淋餐死，天台餐廳又點會開，只有等星期日再訂過。

於是只好轉去Siam Paragon食，因打風落雨都去得到，去左間叫amici的意大利餐廳，每人叫左個磨菇湯，再點左個墨魚黑意粉同炆羊兩份食。

味道認真唔錯，尤其係個墨魚汁意粉，結果盛惠1600B。

到左星期六，因7pm要睇英超車路士，於是只好在酒店速速食算數，順便試下酒店果間中泰式餐廳CharmThai，晚上六點一開門我地就去幫襯，叫左個椰汁雞湯，炒泰國青菜，蒸爐魚。

椰汁雞湯即係冬陰功冇左蝦同辣椒，改用雞同椰汁，啱晒我地怕辣又鍾意泰菜既人。泰國青菜似波菜同西洋菜混合，都好好味。而條魚亦都好滑，難得係起左骨，連細骨都拑走埋，真係啖啖肉。

白飯竟然有三種任揀，普通白飯，加紅米飯，同埋而家好興的加黃米飯，認真健康。

埋單用匯豐卡原來有95折，盛惠1200B。

呢晚雖然食得好趕，但都好滿意，最唔滿意就係車路士竟然輸比維拉2比1，真掃興。

最後一日係星期日，點知早上成個天黑晒，搞到我唔敢再訂露天的Vertigo，只好改去State Tower曼谷最高的Lebua Hotel，一於訂位於頂樓Dome的有蓋餐廳Mezzaluna，當然如果唔落雨，天台露天的Sirocco的夜景會更正，唔使隔住塊玻璃，但結果當晚又真係落狗屎咁大雨。

去Mezzaluna時，傾盆大雨，好彩可在天橋底截的士。到達後，窗外夜景都係矇矓一片，而隔離左右都係一雙一對的老外，但在咁浪漫高雅的環境下，我都叫左個當晚推介的好多道菜套餐。

個餐包括有煎鵝肝，海鮮長通粉，煎雪魚，主菜係牛仔肉。起初影相就話我地唔可以用閃光燈，而我又唔識點調教個相機，諗住唔影就算啦。但後來發覺周圍都閃燈，咁我都唔理咁多，等個待應行開就照影到夠，雖然已miss左頭兩道菜。

每次上菜都介紹一番，但我好多都係唔明係乜野料整，包括開頭整個蛋殼裝住既模士加米通，中間用來清清口的雪葩，甜品裡的糖水等。

全都好好食，除左個主菜的牛仔肉，無乜味。

食到八點多先開始停雨，見到樓下天台的Sirocco開始抹檯抹凳，我地食完順便落Sirocco望下，竟然咁快爆晒棚，不過夜景仍好喑，同Mezzaluna賣廣告幅相的景差好遠。

結果呢餐係我一世人食過最貴的西餐，盛惠11000B，兩人食左成萬銀，真係富貴，不過都係果句，能夠同心愛的人，在咁好咁包容的環境下享受咁難得的浪漫，冇乜計較啦。

反正我都冇乜花錢買野，因港元低水關係，在曼谷買同樣牌子的衣著都比香港貴些少，除非碰上減價，好似CK Jeans咁，同款的白恤衫，香港賣690，曼谷係3000B，約港幣715，當然或者可有退稅，但都係買番泰國牌子，諸如Chaps咁就感覺上會啱數些。

而我每次去曼谷都會買的，就係以下的墨魚汁意粉，今次係在Siam Paragon的超市買的。

係泰國貨，好平但唔知有冇以前的咁好味。