"無聲風鈴": 偏要選中呂玉來

睇完"無聲風鈴",最想講的就係,呂玉來果然好戲,難怪佢以前參與的電影,多次在國外電影節得到殊榮.

我印像最深的係佢為Pascal熨衫的一幕,真摯的愛意盡在表情中.

所以導演阿Kit(洪榮傑)都讚佢好識跟場面互動,好入戲,阿Kit仲話,由於呂係寫劇本的,可以填補到劇本冇寫出來的部份.

我都相信呂玉來完全係阿Kit心目中想要的Ricky,純品到唔會有半點星味.

因為現實中的呂玉來,都係同樣咁樸實,有相為證.

上:往青島奧運風帆場地                 上: 於俄羅斯家庭式旅館

但我又要講多次,阿Kit最初的劇本,係寫比老友林一峰的.

梗係啦,之前兩套短片,"天使"同"窗外"的主角都係一峰,亦都係叫做Ricky.

阿Kit與一峰7月同蘋果日報做訪問時,就講左選角呢個話題.

佢話,最初係想用番一峰,可惜一峰冇時間等佢,期間佢又改左劇本,加入左自己的經歷,於是想搵個真正演員來演.之後認識左關錦鵬,阿關就教佢搵劉燁,但結果都傾唔成,最後先至選呂玉來.

不過,信報健吾在5月"優雅生活"訪問阿Kit時,講法就有些少唔同.

根據健吾篇訪問,當時係阿Kit想阿關幫手搵劉燁,唔係阿關教佢搵劉燁.

阿Kit仲話,阿關聽完後,二話不說立即打電話找到劉燁,叫佢要拍呢套好有意義但冇乜好價錢的戲,最後仲得到劉燁同意,將名字加入"無聲風鈴"的預算陣容內,當然,阿關亦加埋自己做監制添.

但後來阿Kit到左北京選角,一見到呂玉來,阿Kit就知道非呂莫屬了,因呂玉來的氣質比劉燁更接近電影內的Ricky.

所以照咁講,應該唔係劉燁唔肯拍至搵到呂玉來.

唔好以為呂玉來名氣差劉燁好多班,佢唔算有名,但都算係幾有來頭的文藝小生.

或者應該咁講,佢同阿Kit一樣,都係較受外國影展讚賞的一類藝術電影人.

等我詳細咁介紹下佢先.

佢第一套戲係2003年的"孔雀",佢當時21歲,在中央戲劇學院三年班讀緊編劇,唔知點解大師級的顧長衛竟然會睇中佢,要搵佢在戲中飾演十七八歲的弟弟,呢個角色都算係主角之一.

我估係貪佢夠憂鬱,貪佢夠唔起眼,21歲仲好似未發育的中學生,好啱戲中個角色.

有相為證.

上: 大二時的劇照十足初中生           上: 大三時拍"孔雀",似足中學生

結果,"孔雀"獲得了2005年柏林電影節的銀熊獎,亦橫掃第6屆的華語電影傳媒大獎多個獎項,當然,名譽全歸於顧長衛.

呂玉來的第二套電影係2005年拍的"馬背上的法庭",呢套係年青導演劉傑的300萬低成本處女作,由老牌演員李保田同佢分別飾演一老一幼兩法官.

可能劉傑貪佢個樣夠憨直,夠純真,啱晒做雲南少數民族青年呢類角色.

呂玉來第三套電影係2006年拍的"紅色康拜因",都係由新人首次執導,不過今次係新浪潮導演蔡尚君.戲裡面佢同資深演員姚安濓合演兩父子.

或者蔡尚君貪佢性格內斂,外表溫純但內心反叛, 好啱做那個對父親充滿恨怨的角色.

睇睇呂玉來的鄉土造型先.

上: "馬背上的法庭"扮演彝族青年  上: "紅色康拜因"扮演農村小子

結果,"馬背上的法庭"獲得了2006年威尼斯電影節最佳電影獎.呂玉來亦獲得第7屆華語電影傳媒大獎的最佳男配角提名,可惜輸了給"瘋狂的石頭"的黃渤.

"紅色康拜因"更勵害,分別在2007年韓國斧山國際電影節,希臘電影節及2008年澳州亞太電影大獎中獲得大獎,亦入圍2007年摩洛哥電影節的金星獎.

睇睇佢出席電影節時幾型仔.

上: 07年到摩洛哥出席電影節          上: 07年出席韓國斧山電影節

演完左姐弟,師徒同父子等年青配角戲後,07年呂玉來開始擔當較成熟的主角.

佢首先比荷蘭導演睇中,拍左套"樂迷上海",戲中佢飾演上海年青的新一代.因為同老外導演合作,呂玉來話有好大收獲,主要係英文進步左唔少.佢仲在個Blog內寫左成千字,講拍完呢套戲,仍好擔心英文水平未夠的問題.真係個好努力追求進步的演員,唔怪得阿Kit對佢同鬼仔演戲咁有信心.

"樂迷上海"亦入圍荷蘭鹿特丹電影節的影展.

之後佢亦在廣州拍左女導演尹麗川套"牛郎織女",飾演個賣假醋的小男人,夾在兩個女人間.

睇睇呂玉來唔同的造型.

上: 攝於中荷合拍的"樂迷上海"       上: "牛郎織女"中夠晒男人味

結果,"牛郎織女"又再揚威國際電影節,今次仲勁,係入選08年法國戛納導演雙周展映.其實,呂玉來07年都已出席過戛納電影節,當時佢被張藝謀睇中,拍左套3分鐘的短片"看電影",祝賀戛納電影節60大壽,張藝謀係35位被邀請拍賀歲短片的大師級導演之一,佢都睇中呂玉來,可見呂在國際影展算係幾得寵.

講左咁多,不如一次過睇晒呢幾套揚威海外戲的介紹,呢個剪輯係英文版,片中依次序係"孔雀","馬背上的法庭","紅色康拜因","樂迷上海"及"看電影".

而呂玉來亦憑著"牛郎織女"的演出,獲得今年中國電影表演藝術學會獎金鳳凰新人獎.

睇睇"牛郎織女"的預告片,不過在Youtube內只搵到呢個法文字幕版.

"牛郎織女"同"無聲風鈴"更分別獲選為今年3月香港國際電影節中國及亞州電影單元.呂玉和當時都有來港宣傳.

又睇下呂玉來為"牛郎織女"出席不同電影節的靚仔相.

上: 08年法國戛納電影節                     上: 09年香港國際電影節演

而呂玉來拍過咁多得獎藝術片後,終被時尚雜誌Esquire搵左去拍佢地投資制作的電影"時尚先生",呂玉來一改戲路,同主角方中信合拍商業片.我估呢次佢會有較好價錢.

不過,佢之後又要幫雲南政府拍套20集的電視劇"有一個美麗的地方",唔知係唔係拍"馬背上的法庭"後要飲水思源,或者係好似阿關咁講,要拍番些有意義但冇乜價錢既劇.

睇下兩個風格迥然的造型.

上: 時尚先生係白領一族                 上: 出席雲南電視劇的發佈會,要著埋戲服

當然阿Kit亦參與過唔少國際電影節,不過都係同志電影節多,但"無聲風鈴"能得到柏林電影節泰迪熊獎最佳同志電影劇情的提名,都算係好高的榮譽.

同樣地,呂玉來亦算係國際電影節的常客.

所以,阿Kit搵到呂玉來真係互相輝映,呂唔單止演技好,連賣埠都應該幾有幫助.

咁點解呂玉來又肯拍阿Kit部戲?

呂玉來在Blog中寫左以下呢段:

從內心打動我的導演洪榮傑,他的劇本讓我讀後久久無法釋懷,很難相信現今還有那樣真摯的感情,不帶任何的瑕疵,純淨而美好.真的很感動,而這種感動促使我決定出演永健這個角色,去用心還原故事中主人公所經歷的一切.還好,我的表現沒有讓導演失望,在剎青那一天,他臉上燦爛的笑容告訴了我答案.

難得佢用上左純淨同美好去形容同性之愛,可能阿Kit唔搵佢,佢都會爭住做呢.所以"無聲風鈴"能配上呂玉來,簡直係天作之合.