黃耀明: 時裝雜誌專訪

忍唔住手,見本時裝雜誌MR. STYLE搵左黃耀明做封面,盛惠40元都要買來睇睇.

本來打算介紹明哥新專輯裡既英文歌"teardrop淚水",睇完本雜誌,忽然想同大家分享左先.

明哥仍然係Dior的擁躉,佢官仔骨骨的外型配合晒Dior Homme細膩俐落既設計,雜誌拍得佢好鬼正,低調中卻依然華麗.

先睇睇相,我用手機拍的.

上: 剩係掛住影個樣,得番半件西裝

上: 隻蝴蝶襟針又係影得一半

唔怪得有人話,香港還有黃耀明,台灣就想唔出有邊個適合穿Dior Homme.

不過,明哥自己話,佢著衫平時好低調,唔想比人有太多的注意.對時裝亦冇乜研究,好多時佢只會留意音樂人點樣用衣著去表達自己同音樂.

我諗起Wyman(黃偉文)最近在蘋果日報尊欄寫的一段舊事.

佢話明哥其實係個唔多理身世的style icon.

話說好多年前有日,難得明哥竟然要Wyman陪佢去買衫,於是Wyman帶左明哥去Joyce,諗住介紹明哥著Gabbana,點知未去到Dolce既貨架,竟然失驚無神咁殺出左個B嫂章小慧.

章小姐撞面第一句唔係同人打招呼,最緊要都係講衫先,所以佢擘口就問明哥:"你今季打算著乜野牌子啫吓?"

Wyman話,你問明哥近排鍾意乜野歌就唔使諗都會答,但對於B嫂呢個問題,明哥只有哦哦.

唔等明哥再答,B嫂就話:"著多的Gabbana啦,今季好少人襯得到架,我都打算買好多比阿B呀."

講完就走人.當左Wyman係隱形人.

Wyman話,話晒我都係成套JPG架,咁都唔望下.

我心諗,明哥型仔嘛,梗係吸引好多啦,唔恨得咁多架啦.

呢個係15年前既事,今日撞到黃耀明唔好再問佢今季會著乜,佢唔係你想像中既時裝界潮人.

雜誌當然亦讓明哥講下佢隻新專輯啦.

佢話隻專輯就用左龍應台本書"親愛的安德烈"咁既表達形式.

曾經係台北文化局長,前幾年來左香港做客席教授的龍應台,我有時都見佢在明報寫野.

佢同德國籍前夫生左兩個仔,大仔18歲叫做安德烈,龍應台將佢同安德烈既對話,用家書的方式寫左本書,叫做"親愛的安德烈".

龍應台係用朋輩身份同個仔交換日記,放低左母親形像去了解年青人既世界.

黃耀明話佢呢隻碟都用左呢個形式,作為成年人,佢從年青人身上得到一些啟發.

佢欣賞年青人對世界的憧憬,成年人有太多顧慮很難做得到.

我知道佢講既歌係黃偉文寫詞的"親愛的瑪嘉烈",呢首歌亦係明哥當佢係女咁照顧既盧凱彤(at 17)作曲的,剩係睇個歌名都知,擺明就係呼應番龍應台既"親愛的安德烈"啦.

只望前方,沒有底線,離家更是遠,支撐到目前,明哥借呢首"親愛的瑪嘉烈",對無悔追夢的年青人送上誠心祝福.

寫年青人無包袱的歌仲有陳浩峰寫詞的"貪生怕死",作為進念的新創作人,陳浩峰的詞更能表達年青人的百無禁忌.

年青人的世界,樣樣新奇,只會嬉戲,同樣係貪生怕死,不管是輸不起或輸得起,年青人的依然係以玩樂為先.

明哥話佢今次除左用音樂去講成年人值得思考既問題,佢仲用音樂去同年青人對話.

不過,話時話,佢唔知係唔係比阿張敬軒同關楚耀呢班年青歌手啟發左,日前無啦啦在查小欣節目話期待與劉德華合作兼傳緋聞.

緋聞?明哥你講笑好心搵第二個啦,萬一搞到劉德華又去發毒誓就唔好啦.

又做左娛記添,黃耀明新專輯既其他歌都係留番下次再講.