"只有你"的原裝版與肥導演的示範版

台灣的"愛在暹邏"官方部落格搵左肥導演講拍片經過,同肥導演改左個官方譯名,叫做楚克(Chukiat).不過我都係覺得叫佢肥導演親切過叫楚大導好多.

況且,肥導演咁鍾意扮鬼扮馬,又真係唔多似大導演架,嗱,有片為證.

上: "愛在暹邏"中的肥導演

你睇當阿瑩話佢狗口長不出象牙時,佢個表情幾鬼有交待.

都係聽肥導演講佢電影裡的歌先啦.

佢話電影每首歌都同戲中情節緊緊呼應,就正如戲中阿繆的外婆咁講,用歌曲來表達心中意思,也用歌曲來留住各種思念.

電影的第一首歌係"車票(日遊)",肥導演安排這首歌在阿繆跟阿棟離別後,轉接到佢地長大後重遇前的片段內播出.佢話這首歌婉轉咁表達著阿繆心裡面含蓄的愛.

劇情安排這首歌好受歡迎,但戲中唱片監制仍要求樂團要直接去寫情歌,肥導演話佢借此引出電影的主題,即係阿繆開始要諗:愛對佢來講究竟是什麼?最後阿繆因此而寫出左主題曲"同行",反映左愛係阿繆生命中最重要的事.

肥導演話呢首"同行"的歌詞好簡單好直接,佢都唔記得係幾時寫,只記得係在準備"愛在暹邏"劇本前已完成.

跟住的歌是"你能感受到嗎?",呢首係Pchy自己寫的歌,講兩個人因為離別而難過了好一段日子,歌詞中的"你能感受到嗎?那些我們一起的日子,我們一起的日子,沒有一天不充滿著快樂."正代表著戲中阿繆心裡想問的問題.導演又用左歌來傳達了故事的本意.

接著的一首歌係"無盡之夜",這首歌安排在戲中每個人最失落的時候播出,歌聲伴著每個徬徨無助的面容,每個人都彷彿迷失在無邊的黑暗中,就如在人生中的每一段低潮中,要不停地掙扎去尋找出路...肥導演話呢首歌提供左讓我地可以好好奮鬥下去的理由.

肥導演話佢寫這首歌時係讀緊大學二年級,呢首歌係佢當時為一套舞台劇配樂而寫的,佢今年27歲,即係佢6或7年前寫的歌.

佢提到唱這首歌的小胖阿Pet原來係曾得過06年泰國最佳青年演唱者獎,現在小胖係August Band裡除左Pchy外的另一個主唱.

而最後一首歌係"只有你",佢唔講我都唔知,原來呢首歌唔係肥導演作的,佢話呢首係十年前多一個叫做Sukanya Mikal的女歌手唱的.照咁計,肥導演當時只得15或16歲.

佢話佢好鍾意呢位女歌星,更加鍾意呢首歌的歌詞,好能代入到戲中每個角色的情緒同感覺,簡直係佢心目中最想要的歌詞.佢仲話呢首歌好多人都耳熟能詳了.

佢講到咁正,我一於試試上網找出這首歌.

我先在Ethaimusic搵左Sukanya Mikal的泰文寫法,然後加埋"只有你"的泰文寫法,複制後擲上YouTube搜尋.果然話都冇咁易就搵到這首好似話係1996年的原裝版"只有你",超乎我估計,好鬼正,肥導演真係冇介紹錯.

未睇"只有你"的原裝版前,請先睇左我制作的肥導演示範(Demo)版"只有你",示範版來自"愛在暹邏"原聲專輯.

點解要睇肥導演版本先,因為原裝版冇配上中文字幕,要先從我的版本感受左歌詞先.

上:肥導演的"只有你(示範版)"

然後再睇"只有你"的原裝版.你會覺得好似睇緊英文MV.

上: Sukanya的原裝"只有你"

唔怪得肥導演要借用呢首歌做插曲啦,剩睇個MV,直情就係"愛在暹邏"的女生版.肥導演拍"愛在暹邏"的靈感話唔定都係由呢首歌處來的.

肥導演講啲又唔講晒,一味只係話正,原來係咁解.