網誌分類：TheRe之生活 |
圖片
網誌日期：2009-11-28 18:25
我被"炮烙"嘅右手,過咗幾日,已經無咁痛喇!
燙到嘅皮膚感覺仲皺皺緊緊咁!而手指頭部分,就好似乾燥甩皮咁!
不過都無咁痛喇!無當日灼傷嗰種痛 。
手指公嘅水泡都穿咗喇!噢......穿嗰時真係超痛,仲流水呢!
我都唔知發生咩事,成個11月黑到爆呀!
1)電腦月中時壞咗!唔知點解,開唔到個Window。我就問Myron借隻Window碟,重新裝過。因為我好多有關結婚資料喺電腦中,而且都幾急要用。
可惜......我總共用咗10個鐘都安裝唔到,心諗.....唔通我唔識裝唔到????不過無理由呀!咁又急住用,唯有攞去落下新開嘅電腦舖檢查,佢話我個Hard Drive壞咗!如果要換250GB就$430蚊;500GB就要$700幾蚊。
我當場問問我啲朋友意見啦!佢哋都話唔抵,太貴喇!咁只好叫我老死阿Tom同我去深水涉買啦!500GB都係$353蚊呀!可想我樓下食水幾深
諗住實得啦!安 Hard Drive好簡單啫!點知唔知點解都唔得。因為Tom唔知咩事,所以第2日就攞去另一個朋友去睇睇喇!
朋友開機一聽聲,就知死火牛,唔關Hard Drive事,真係激死我呀!
累我突然買多個500GB嘅Hard Drive,都唔知做咩????
唉......樓下電腦仔白白累我用$500幾蚊先整好部電腦,本來$200蚊就搞掂。真黑仔......
不過我好感謝我老死Tom同佢個朋友仔"鬈毛"呀!要出智力幫我之餘,仲同我Update埋最新嘅Window 7,而且出力幫我抬部機箱呀!小妹無言感激呀!
2)星期一23/11日,食嘢時無啦啦又咬到左面嘴角,流晒血喪痛。可能因為晚晚要搵返啲電腦資料,而唔夠瞓,好燥呀!
3)燙到手就算啦!
4)連腳貼咗膠布,都可以俾鞋整損......女人隻腳真係多傷痕呀!
以下唔臭嘅腳,可能會引起大家不安,敬請原諒!!!!
唉.....真係黑開有條路呀!手痛腳痛,工作到成身腰酸背痛,死未???都唔知幾時先黑完呀!
