30/3 要做手術嘅畢畢......

             我家嘅小畢畢前幾日,唔知點解突然痾唔出尿尿,佢舉起腳仔成3-4分鐘都痾唔出一滴尿,見佢個樣好辛苦呀!成晚走嚟走去,無咩點瞓過覺,擔心死人。佢平時好鍾意食嘢!但佢連糧都唔食,所以一定好辛苦。

             之後星期六就即刻同佢睇醫生,點知小畢畢腎結石,要做手術......心痛死我哋呀......媽媽都好捨得畢畢有事,都當畢畢係我哋一家人喇!所以差唔多$7000蚊手術費連住院檢查等,都要救返佢。 雖然真係真係好貴......但係既然都揀咗養佢,就要養佢同照顧佢終老呀!

             喺醫院唔喺屋企嘅畢畢,我一返去無佢吠住歡迎我,我真係好唔慣。好掛住佢呀!

             我哋去咗拜山,探完豆豆之後,我哋去探畢畢,佢都表現得好興奮呀!我諗佢都好掛住我哋。

             腎石要攞去化驗,2-3個月之後先知咩事會有腎石......之後要定期驗尿,睇住康復進度。

             終於都返屋企喇......

             睇吓佢個樣,謝晒......

            好可憐呀!行得好慢......

            可能做完手術,所以唔係好有心機呀!

                手隻插咗針個傷口呀!痛......

                以下相片可能會引起不安......不便之處,敬請原諒!!!

              痛......痛.......痛......!!!!傷口附近要剃毛,先可以做手術。要用管將啲腎石通返上腎入面,再開刀攞返腎石出嚟!

              其實畢畢個口仔成日都好臭,都知道佢有好多牙石,原來醫生話仲有爛牙。因為割腎石手術要全身麻醉,順便就洗牙同脫埋爛牙仔喇!總共有8隻......所以而家食嘢唔似之前咁快喇!

            醫生就話平時食寶路出嘅潔齒骨唔夠硬,佢哋咬唔耐,唔可以好好發揮到潔齒效果,所以轉吓Royal Canin呢隻會再硬啲!等佢哋咬耐啲!再乾淨啲!

!    

           仲要食藥呀!但我唔係好識餵畢畢食呀!觀察佢小便順唔順暢,一有唔順暢就又要返去喇!仲要睇吓抗生素食啱唔啱佢食呀!

           唉........豆豆生前都超愛同超錫畢畢呀!希望豆豆保佑畢畢快啲好返,可以順順利利康復。