15/3 入廚喇喂之可樂冬菇蓮藕炆豬手

             因為之前煲湯浸開冬菇,所以就浸多啲!可以炆埋嚟食。所以媽媽就買咗隻豬手同細節蓮藕齊炆喇!,跟吓媽媽學嘢喇!

             材料:主角梗係有豬手1隻、可樂1罐、冬菇大約15隻(隨意)、蓮藕一節(隨意)、老抽。

           豬手洗乾淨後出水,可以無咁油。

            蓮藕洗乾淨切片,薑一片。

            冬菇浸透,再拍半個蒜頭。

             汁料:可樂半罐,老抽1/3碗。

            首先落少少油爆香蒜頭同薑,再落豬手爆香,加入汁料後,再落冬菇同蓮藕。炒勻所有材料,再炆45-60分鐘。

             哈哈......有得食喇!如果啲汁撈飯,超正!!不過我依然無撈飯食,因為近嚟唔食得澱粉質。因為我由細到大,好鍾意食媽媽整嘅可樂雞翼,撈汁可以食2碗飯呀!但之後知道雞中翼側邊嗰塊雞皮仔超級肥之後......(我一向唔食雞皮,除呢部分之外)我成1年幾無食過可樂雞翼呀!所以趁今次回味吓先。