97 - 無常

人生變幻無常 , 有好多事 , 都係有咁o岩 , 得咁(橋)

好~~廢話講完

-------------------------------------------------------

　　查實係咁嘅，話說小弟早果幾日同幾位友人豪情暢飲加上深宵打機，直到凌晨三點先返到屋訓覺，第二朝又要返八點喎 , 姐係要七點起身啦，咁咪出事囉 ~~~ 第二朝又要變疆屍，實比人潤到爆

　　點知訓到六點都未到就比個死人惡夢嚇醒左，真係慘過見到貞子，仲攪到成身大汗，訓又訓唔著，今次真係大件事，跟住走去廚房睇下有冇野食啦，行左幾步，兩條鼻涕好似 laser 咁樣射左出黎，仲感覺到頭入面好似燃燒緊小宇宙，唔駛探熱針都已經知道自己發燒了~~~~yeah!!!!!

　　咁到左７：３０我就歡天喜地咁打左返去老人院寫字樓，話比同事聽要告假一天啦，仲拿拿林換埋衫，諗住走去青松觀睇廉價西醫，好平架，２５大洋有病假，實為射波的好去處，點知走到去，大大隻字寫住〔內部裝修，停辦一星期〕，睇到我眼都突，姐係點呀，咪又要睇貴野囉，之後死死地氣走返去屋企樓下商場睇私家，果間野個醫生出名小器，我十年黎只係睇過佢幾次，次次見親佢會實話：〔呀～～你好耐冇黎睇醫生喎〕，你去死啦，想咒我成日病呀，睇都唔睇你啦咁貴

　　入到去醫生房，佢又講：〔呀～～廖先生～～你好耐冇黎睇醫生喎〕
　　　　　　　上次果句係：〔呀～～小朋友～～你好耐冇黎睇醫生喎〕

　　我：〔咁我身體好嘛，咪唔駛成日睇醫生囉〕我次次都係講呢句

　　佢就緊係小小器咁冇聲出啦，知後又好例牌咁問呢樣問果樣，我又好例牌咁講呢樣講果樣，最後就２００大洋，一日病假，成交！真係肉都赤ｘ埋，攪到個腦只係諗住Ｄ特價杯麵同三文治

　　諗住走果陣，佢突然間好正氣澟然咁話：〔同你ｃｈｅｃｋ埋血壓先走啦〕，咁我就唔同佢客氣啦，比隻右手佢，佢用好傳統果隻手動水銀血壓計同我泵，仲泵到鬼死咁緊，痛死人咩，真係想當堂車巴佢，只後佢眼到突晒望住個血壓計同我講要ｃｈｅｃｋ埋左手，又再泵過囉

　　完事之後佢就同我講：〔你血壓都幾唔正常喎〕

　　我：〔下～～有幾唔正常呀〕

　　佢比個血壓計我睇，好彩我都識睇，因為老人院成日都會用的，我間中都會拎黎玩下，睇睇下，唔多對勁喎，上壓１７４，下壓５２，有冇差咁遠呀

　　佢又話：〔你唔單止血壓唔正常，連心律都好唔平衡，ｃｈｅｃｋ　ｃｈｅｃｋ佢好ｄ喎，唔排除會有隱性心臟病〕

　　我：〔下～～有冇咁嚴重呀〕

　　我好似淨係識得講〔下下下〕咁，講真果句，有時自己靜靜地坐低果陣都會心跳時快時慢，久唔久我就會頭痛幾個星期，呢個醫生講嘅野又未嘗唔係冇道理的

　　我：〔咁而家可以點？〕

　　佢話：〔你可以搵相熟嘅醫生睇下，照下心電圖，ｃｈｅｃｋ埋血壓血糖血脂，早Ｄ睇，防患於未然，就算就係有病，都可以補救得切啦，你咁後生，我都唔想你真係有心臟病啦，早Ｄ　ｃｈｅｃｋ下佢啦〕

　　我唔該左佢一句就走，比佢咁講一講，心情即刻ｄｏｗｎ哂，比埋錢拎埋藥果陣，我係度諗，如果我真係有心臟病，咁咪又要洗錢食藥囉，死啦，而家Ｄ藥咁貴，仲有！入戲院睇戲都要諗過先囉，如果唔係會突然間嚇死左係戲院入面囉，去玩又要諗下先囉，Ｄ機動遊戲又唔可以玩囉，仲有乜乜乜乜乜，人生姐係冇晒樂趣囉

　　唉～～算吧啦，如果真係要我死，就點避都避唔到啦，而家唯有改善一下自己Ｄ生活習慣，改善一下飲食，做多Ｄ運動，希望可以補救得切啦，再唔係就自暴自棄，玩死罷就啦

　　就當我決定改善自己咁惡劣嘅人生的時候，就當我下定決心的時候，就比我係呢個醫生間診所出面睇到呢一句

〔本診所內設心電圖測試，並包括檢驗血壓血糖血脂，特價＄８８０〕

你條粉腸！！！