喬家大院_第九集

大陸劇, 唔係個個頂得順。

有人自認潮爆, 覺得大陸劇老土, 見到即閃。有人自認好鬼 "左", 覺得大陸劇下下 "配合中央主旋律", 兼sell帝皇將相、五千年奴才思想, 堅信睇多兩眼會被洗腦, 鬼上身.......

小弟郤認為, 你係乜嘢人, 自不然就睇到乜嘢。你係醒既人, 自然睇到人地醒嗰方面。 一如你係咸濕佬, 自不然睇見膝頭哥都會流鼻血。就好似早前那班蠢斃了的甚麼廣管局和明光社之流, 因為腦袋裏裝的都是淫賤臭水, 你幾咁好人好姐佢地都會話係洪水猛獸。

              (二)

我係那類"頂得順"大陸劇的人, 覺得有野學。近來在無線收費電視追看中央台電視劇<喬家大院>。嘩, 勁到震! 真係繼早兩年<走向共和>後又一鉅獻。 睇到第九集, 男主角要幫家族籌錢, "局住"要娶一個財主之女, 於是要同青梅竹馬的表妹分手........

呢段戲, 寫得唔好, 好易變成娘爆婆乸中人欲嘔, 慘不忍睹者,  有如劣質sit com。但係用得咁多字去講, 就梗係唔係嗰回事。呢個戲

劇本好, 層層推進, 將主角迫入死角。

對白好, 句句入肉, 冇多餘廢話, 上完roller仲會回味。

演員好, 入型入格, 一個眼神一個身段, 處處恰到好處, 將油頭粉面淺薄跨張的港劇演員踢到大西洋。

導演好, 開位靚, 節奏好, 舖排見心思, track back zoom in, 車軌等等應用則用, 唔係d二打六未學行先學走所謂 producer咁拍到古靈精怪。

重有lighting好, cam work 好, 連道具佈景服裝都仔細到暈。除了香港人最叻既打戲佢唔識拍, 通通可以歸類為有嘢學。

(男主角勁苦惱, 爬上屋頂吹吹風。 呢個喬家大院屋頂咁detail, TVB古裝場地一千年後都做唔到。)

(服裝、頭飾、道具、燈光、攝影, 一張劇照就已經話晒你知睇套戲你可以學到幾多嘢。)

             (三)

拍Drama, 唔係common sense, 唔係講打天才波, 唔係排rundown, 唔係識book邊部機器邊隻燈, 唔係撚鏡頭filter, 唔係搵靚仔靚女做, 唔關錢多錢少事, 唔係同artist "social", 唔係向老細吹水, 唔係喺同事面前作大, 唔係拍嗰少少嘢就自我感覺良好到以為係大師級.......

喬家大院網站http://www.ctv.com.tw/event/2006/qiaojia/