大條樂理 16

今時今日我諗唔小樂迷包括我自己, 買咗一隻新cd番嚟, 第一件事就係拆開import入電腦嘅音樂播放軟件, 隨著聽歌嘅方法數碼化加上非法下載嘅威脅, 近年唔小地方嘅音樂販賣以及宣傳模式亦都有數碼化嘅趨勢!

數位專輯就係其中一個例子喇, 歌手將佢地整張專輯放上已經授權嘅網站俾樂迷喺網上俾錢之後直接下載到自己嘅電腦, 有時可以係俾一個價錢然後成張專輯download落嚟, 有時亦都可以係遂隻遂隻歌咁俾錢download, 莫文蔚啱啱對上呢個暑假就出咗佢首張嘅數位專輯 回蔚

這首半個月亮爬上來是新疆民歌, 係莫文蔚在回蔚大碟中嘅其中一首作品, 回蔚呢張album係將一啲中國民謠及經典歌曲混合咗新嘅旋律同歌詞，配合埋新嘅編曲，而呢首半個月亮爬上來就係加入咗莫扎特嘅歌劇《唐璜》入面嘅其中一段, karen仲自己唱番女高音嘅部份,所以 無論係音樂上定係售賣模式回蔚呢張數碼大碟都係非常創新,咁成績方面又如何呢?! Ok架,收益比以往仲高添,其中一個原因我相信係因為數碼大碟可以俾世界上唔同嘅樂迷24小時下載,解決咗好多地域上,代理上嘅界限,可接觸範圍多咗自然就有助銷量啦, 加上唔駛印碟,環保之餘仲令到成本下降都係數碼大碟嘅優勢, 呢種歌曲銷售模式喺外國都好普遍, 唔小歌手好似Gwen Stefani, 宇多田光都試過將single擺上網發售,不過講到最型嘅就係英國嘅RADIOHEAD喇!!!

07年佢地推出第7張大碟 IN RAINBOWS公開發售實品之前呢就將全隻碟嘅歌擺上網任人試聽過之後自訂價錢去DOWNLOAD, 即係話你覺得值幾多就俾幾多, 什至乎唔俾都得, 最後有過百萬嘅download次數架, 雖然佢地所屬嘅唱片公司就無公開網上面實質嘅官方銷售額,但係可以肯定嘅係呢個做法絕對無影響呢隻碟喺UK ALBUM CHART同埋US BILLBOARD嘅成績,而且喺音樂界入面引起好大嘅迴響, 直情好似免費宣傳咁, 講到免費, 經常利用網絡世界去宣傳自己音樂嘅何韻詩早前喺未推出HEROES呢張ALBUM之前就試過將單曲舊約任樂迷合法下載同上載到個人嘅BLOG, FACEBOOK,TWITTER等等作為演唱會嘅宣傳

與其遲早被人非法DOWNLOAD倒不如先下手為強都算係數碼歌曲嘅洐生原因之一, 但係數碼化專輯最大嘅一個問題就係音質方面, 由於經過壓縮嘅關係,質量一定會有影響,所以有啲人仍然堅持買CD就係追求實際同心理上嘅原汁原味, 不過作為配合大碟宣傳又未嘗不可, 盧巧音07年轉會之後推出嘅《Process》除咗有普通CD版本, 亦都有限量嘅USB記憶體特別版, 將7首歌嘅MP3放哂入手指入面賣俾樂迷,係首個亞洲歌手推出USB記憶體版本唱片

數碼大碟暫時喺香港未算好普遍, 不過非法下載問題, 小咗人買CD, 愈嚟愈多網上音樂銷售店通通都係事實, 我自己覺得CD絕對有一日會好似黑膠咁成為歷史,咁又點呀, 咁咪仲趁有得買買多啲囉, 話唔定第時攞上網BID有價有市架!