Leave me a message -- repeat自己

朋友話維繫到好長嘅時間嘅情人,

其中一個原因係可以試吓打破自己嘅節奏, 唔好repeat自己,

試多啲新野, 試多啲你地嘅第一次,

啱嘅, 不過老老實實喇,

時間耐咗兩個人嘅第一次係愈來愈難製造,

對咗10年8年可能真係諗到都做過,

我覺得有陣時反而係要repeat自己喎,

例如而家好多人都係出去飲野, 去clubbing嘅時候認識,

date緊嘅時候,

2個人好多時會食完飯再去坐低飲杯野,

或者一齊再出去join啲friend落吓蘭桂芳玩,

但係到咗成為情侶之後呢?!

仲有無兩個人出去飲野呢,

出去一班人玩仲有無理佢呢?!

大部分人會覺得都拍咗咁耐拖, 一就有咩都講哂,

一就有咩都番到屋先慢慢講啦,

唔駛特登嘥錢出去坐低飲野,

一班人出去就更加係爭取時間同其他人玩,

又未必架喎,

我試過明明已經同咗一個人一齊好一段日子,

但係有一次我地去朋友嘅party,

玩玩吓我地好似初相識嘅時候咁,

自己兩個玩drinking game, 自己兩個飲酒, 自己兩個傾偈,

側邊啲人望落去真係唔知我地係拍緊拖架,

感覺好好架,

嗰種唔係純粹兩個人喺度懷念過去,

而係大家用緊一個好耐都無用過嘅模式相處,

兩個人可以維繫到好長嘅時間除咗大家都愛對方,

仲有一個好重要嘅原因,

就係大家同時可以搶當到唔同嘅角色,

有時我地可以好肉麻咁攬埋一舊,

有時我地又好似朋友咁隔住張枱, 飲杯野,

講吓自己近期有咩開心唔開心呀, 識咗咩新朋友呀,

有時我地又好似一班朋友入面嘅兩個獨立個體,各自投入, 各自玩,

有時我地又好似唔同輩份嘅人, 互相指點, 互相批評,             

做咗人男朋友, 女朋友,

有時剩係記得保持愛你, 保持情人嘅角色,

但係其實我地好貪心, 要一個伴侶唔止想佢靚, 想佢條件好,

想佢對我地好,

仲想適當嘅時候佢可以做唔同位置,

呢個係實際需要,

亦都同時係令兩個人有唔同嘅生活節奏,

有時repeat番以前未拍拖, 啱啱拍拖時候做嘅事,

可能都係一個方法!